ޣައްޒާގައި ކާބޯތަކެތީގެ ދަތިކަން ދިމާވެފައިވާ ކަމަށް އދ. ގެ އިންސާނީ އެހީތެރިކަމުގެ ކަންކަން ވިލަރެސްކުރާ އޮފީހުން (އޯސީއެޗްއޭ) އިން ބުނެފިއެވެ.
އޯސީއެޗްއޭއިން އިއްޔެ ނެރެފައިވާ ރިޕޯޓެއްގައި ބަޔާންކޮށްފައިވާ ގޮތުގައި މި ދަތިކަން އިތުރަށް ގޯސްވެފައިވަނީ ބޭނުންވާ ތަކެތި ލިބުމުގައި ދިމާވެފައިވާ ދަތިކަމާއި، ސަރަޙައްދަށް ވަނުމުގައި ކުރިމަތިވެފައިވާ ހަރުކަށި ހުރަސްތަކުގެ ސަބަބުންނެވެ.
އޯސީއެޗްއޭ އިން ފާހަގަކޮށްފައިވާ ގޮތުގައި މެދު ޣައްޒާގައި ތިބި އިންސާނީ އެހީތެރިކަން ފޯރުކޮށްދޭ ފަރާތްތަކުގެ އަތުގައި ހުރި ހުރިހާ ތަކެއްޗެއް އާދީއްތަ ދުވަހު ވަނީ ހުސްވެފައެވެ. އަދި އިޒްރޭލުގެ އިދާރާތަކުން އެރެޒް ޗެކްޕޮއިންޓް މެދުވެރިކޮށް ޣައްޒާ ވާދީގެ ދެކުނަށް ކާބޯތަކެތީގެ އެހީ ގެންދިއުމަށް އެދުމުން އެކަމަށް ހުއްދަ ނުދީ ހުރަސްއަޅަމުންދާ ކަމަށް ވެސް ބުނެފައިވެއެވެ.
މި ރިޕޯޓުގައި އިތުރަށް ފާހަގަކޮށްފައިވާ ގޮތުގައި ޣައްޒާގެ މުޅި އާބާދީއަށް ތިން މަސް ދުވަހަށްވުރެ ގިނަ ދުވަހަށް ބޭނުންކުރެވޭ ވަރަށް 120,000 މެޓްރިކް ޓަނުގެ ކާބޯތަކެތީގެ އެހީ މިހާރު ވެސް ހުރީ އިޒްރޭލުން ވަނުމުގެ ހުއްދަ ނުދޭތީ އެސަރަޙައްދުން ބޭރުގައި ހިފެހެއްޓިފައިވާ ކަމަށެވެ.
އަދި އިތުރު ތަކެތި ފޯރުކޮށްނުދެވިއްޖެ ނަމަ ބަނޑުހައިހޫނުކަމުގައި ތިބި އާއިލާތަކަށް ކާބޯތަކެތި ވަރަށް ބޮޑަށް މަދުވެގެންދާނެކަމަށް ވެސް ރިޕޯޓުގައި ފާހަގަކޮށްފައިވެއެވެ.
މީގެއިތުރުން ޖަނަރޭޓަރުތައް ހިންގުމަށް ބޭނުންވާ ތެލުގެ ދަތިކަމުގެ ސަބަބުން ޣައްޒާގެ ޞިއްޙީ ނިޒާމު އިތުރަށް ދަށްވެގެންދާނެ ކަމަށާއި، މިކަމުގެ ސަބަބުން ބަލިމީހުންގެ ފުރާނައަށް ނުރައްކާވެފައިވާ ކަމަށް ވެސް އޯސީއެޗްއޭ އިން އިތުރަށް ބުނެފައިވެއެވެ. އަދި އުތުރު ޣައްޒާގައި ކުރިއަށްދާ ހަމަލާތަކުގެ ސަބަބުން އެ ސަރަޙައްދުގައި ދިރިއުޅޭ މީހުންނަށް ޞިއްޙީ ޚިދުމަތް ލިބުމަށް ވަރަށް ބޮޑަށް ދަތިވެފައިވާ ކަމަށް ވެސް އޯސީއެޗްއޭ އިން ބުނެފައިވެއެވެ.
އދ. އިން އުތުރު ޣައްޒާއަށް ވަނުމަށް ކުރަމުންދާ މަސައްކަތްތައް ކުރިއަށް ގެންގޮސްފައިވީ ނަމަވެސް، އިޒްރޭލުގެ އިދާރާތަކުން މި މަސައްކަތްތަކަށް ހުރަސްއަޅަމުންދާކަން ފަހަގަކޮށް އދ. އިން ބުނީ މިކަމުގެ ސަބަބުން ޣައްޒާގެ ޙާލަތު އިތުރަށް ގޯސްވެގެންދާނެ ކަމަށެވެ.
މިއާއިއެކު، އދ. އިން ވަނީ މިކަންކަމަށް އަވަސް ފިޔަވަޅުތަކެއް އެޅުމަށާއި، އިންސާނީ އެހީތެރިކަން ފޯރުކޮށްދިނުމަށް އިޒްރޭލުން އަޅަމުންދާ ހުރަސްތަކަށް ނައްތާލައި، ޣައްޒާގެ އާންމު ރައްޔިތުންނަށް ދިމާވެފައިވާ ދަތިތަކަށް އަވަސް ޙައްލެއް ހޯދުމަށް ބައިނަލްއަޤްވާމީ މުޖުތަމަޢުއަށް ގޮވާލާފައެވެ.