އައްޑޫ ސިޓީގެ ހަންކެޑެ ބްރިޖް ހުޅުވުމާ ގުޅިގެން، އެ ސަރަހައްދުގެ ބައެއް މަގުތަކުގެ ދަތުރުފަތުރުގެ ނިޒާމަށް ބަދަލުތަކެއް އަންނާނެކަމަށް އައްޑޫ ސިޓީ ކައުންސިލުން އިއުލާނުކޮށްފިއެވެ.
މާދަމާއިން ފެށިގެން އާންމު ބޭނުންތަކަށް ހުޅުވާލެވޭ މި ބްރިޖަކީ ހިތަދޫއާއި މަރަދޫ ގުޅުވައިދޭ ބްރިޖެކެވެ. ބްރިޖް ހުޅުވުމާއެކު، މިހާރު ބޭނުންކުރަމުންދާ ހަންކެޑެ ލިންކް ރޯޑްގެ މަރަދޫއާ ގުޅޭ ހިސާބު ބަންދުކުރެވި، އާންމު ދަތުރުފަތުރަށް އެ މަގު ބޭނުން ނުކުރެވޭނެއެވެ.
ކައުންސިލުން ގެންނަ އިތުރު ބަދަލުތަކުގެ ތެރޭގައި ބައެއް މަގުތައް އެއް ދިމާލަކަށް ދުއްވާ ގޮތަށް ބަދަލުކުރުމާއި، ވަކި ސަރަހައްދުތަކުގައި އުޅަނދު ޕާކުކުރުމުގެ އުސޫލުތަކަށް ބަދަލު ގެނައުން ހިމެނެއެވެ. މި ބަދަލުތަކުގެ ތަފްސީލު ކައުންސިލުގެ ސޯޝަލް މީޑިއާ ޕްލެޓްފޯމްތަކާއި ދިވެހި ސަރުކާރުގެ ގެޒެޓުގައި ޝާއިޢުކޮށްފައިވާކަމަށް ކައުންސިލުން މަޢުލޫމާތު ދީފައިވެއެވެ.
ހަންކެޑެ ބްރިޖުގެ އިމާރާތްކުރުމުގެ މަސައްކަތް ފެށުނީ 2021 ވަނަ އަހަރުގެ އޮކްޓޯބަރު މަހުގައެވެ. މި މަޝްރޫޢު ކުރިއަށް ގެންދިޔަ އެފްކޮންސް ކުންފުނިން ބްރިޖުގެ މަސައްކަތް ނިންމައި، ސަރުކާރާ ހަވާލުކުރީ 2022 ވަނަ އަހަރުގެ އޮގަސްޓް މަހުގައެވެ. ނަމަވެސް، އިތުރު ޓެކްނިކަލް ސަރވޭތަކެއް ކުރަން ޖެހުމުގެ ސަބަބުން ބްރިޖް ހުޅުވުން ލަސްވެފައިވާކަމަށް އިމާރާތްކުރުމާބެހޭ ވުޒާރާއިން ކުރިން ބުނެފައިވެއެވެ.
1.4 ކިލޯމީޓަރުގެ ދިގުމިނުގައި އިމާރާތްކޮށްފައިވާ މި ބްރިޖަކީ 4 ލޭނުގެ މަގެކެވެ. މި ބްރިޖުގެ މަސައްކަތަކީ އައްޑޫ ސިޓީގެ މަގުތައް ތަރައްޤީކުރުމަށް ކުރިއަށްގެންދާ 1 ބިލިއަން ރުފިޔާގެ މަޝްރޫޢުގެ ބައެކެވެ.