މި ސަރުކާރުގެ 5 މިލިއަން ގަސް އިންދުމުގެ ޤައުމީ މަޝްރޫޢުގެ ދަށުން، ކުޅުދުއްފުށި ސިޓީގައި ގަސްގަހާގެހި އިތުރުކުރުމުގެ މަޤްޞަދުގައި، 258 ގަސް އެސިޓީގެ ކައުންސިލަށް ހަދިޔާކޮށް، ގަސް އިންދުމުގެ ޚާއްޞަ ޙަރަކާތެއް ބާއްވައިފިއެވެ.
މިނިސްޓްރީ އޮފް ޓުއަރިޒަމް އެންޑް އެންވަޔަރަންމަންޓް އިން ބުނީ ހދ. ކުޅުދުއްފުށީގައި ގަސް ހެއްދުމުގެ މަސައްކަތް އިތުރަށް ފުޅާކޮށް، ރަށުގެ ފެހިކަން އިތުރުކުރުމުގެ މަޤްސަދުގައި 250 ބާވަތްބާވަތުގެ ގަހާއި، އިތުރު 8 ހައިވަކަރު ގަސް (ޓީކް ގަސް) އެ ރަށަށް މިހާރު ވަނީ ފޯރުކޮށްދީފައި ކަމަށެވެ.
އަދި މި މަސައްކަތް ކުރިއަށް ގެންދިއުމަށްޓަކައި ކުޅުދުއްފުށީ ކައުންސިލްގެ ނާރސަރީއާ ގުޅިގެން އެއްބާރުލުން ދިނުމަށް އެއްބަސްވުމެއް ހަދާފައިވާ ކަމަށް މިނިސްޓްރީން ހާމަކުރެއެވެ.
“މި ގަސްތައް ދިނުމުގެ އިތުރުން، ކުޅުދުއްފުށީގައި ހުންނަ ކައުންސިލްގެ ނާރސަރީއާ އެކު މިކަމުގައި އިތުރަށް އެއްބާރުލުން ދިނުމާ މެދު ވަނީ ފުޅާ ދާއިރާއެއްގައި މަޝްވަރާކުރެވިފައި“ މިނިސްޓްރީން ބުނެފައި ވެއެވެ.
މި މަޝްވަރާތަކުގައި، 5 މިލިއަން ޕްރޮޖެކްޓަށް ބޭނުންވާ ގަސްތައް ހެއްދުމަށް އެހީތެރިވުމުގެ ގޮތުން، ވަކި ސަރަހައްދެއްގެ ފަސްގަނޑު މުއްސަނދިކޮށް، އެ ޕްރޮޖެކްޓަށް ބޭނުންވާ އެންމެ ގިނަ ގަސް ހެއްދުމަށް ދެފަރާތުން އެއްބަސްވެފައިވާ ކަމަށް މިނިސްޓްރީން ހާމަކުރެއެވެ.
މި އެއްބަސްވުމުގެ ދަށުން ކުރިއަށްގެންދާނެ ކަންކަމާއި، މަސައްކަތްތައް އިންތިޒާމުކުރާނެ ގޮތާ ބެހޭގޮތުން ދެފަރާތުން އިތުރަށް މަޝްވަރާކޮށް، ކަންކަން ސީދާކުރުމަށް ވަނީ ނިންމާފައެވެ.
މި މަސައްކަތްތަކުގެ ސަބަބުން ކުޅުދުއްފުށީގެ ތިމާވެށި ރައްކާތެރިވެ، ރަށުގެ ރީތިކަމާއި ފެހިކަން އިތުރުވެގެންދާނެ ކަމަށް މިނިސްޓްރީން ލަފާކުރެއެވެ.
ކުޅުދުއްފުށި ސިޓީގެ ތަފާތު ސަރަޙައްދުތަކުގައި މި ގަސްތައް އިންދުމުގެ ޙަރަކާތެއް ވަނީ ކުރިއަށް ގެންގޮސްފައެވެ.
މި ޙަރަކާތުގައި ކައުންސިލް މެންބަރުންނާއި، ދައުލަތުގެ ބައެއް އިދާރާތަކުގެ އިސްވެރިންނާއި، ކުޅުދުއްފުށީގެ ރައްޔިތުންގެ ބައިވެރިވުން ވަރަށް ބޮޑުކޮށް ފެނިގެންދިޔައެވެ.
މި މަޝްރޫޢުގެ މައިގަނޑު މަޤްޞަދަކީ، ދިވެހިރާއްޖޭގެ ތިމާވެށި ރައްކާތެރިކޮށް، ރަށްތަކާއި ރަށުތެރެއަށް ގަސްގަހާގެހި އިތުރުކުރުމެވެ.
ޚާއްޞަކޮށް، ރަށްތަކުގެ ހިތްފަސޭހަކަން އިތުރުކޮށް، ގަސްގަހާގެހި ގިނަކުރުމުގެ ސަބަބުން ލިބިގެންދާ ތިމާވެށީގެ ފައިދާތައް ހޯދުމަށް މި މަޝްރޫޢުއިން ވަރަށް ބޮޑަށް އެހީތެރިވެދޭނެއެވެ.
ކުޅުދުއްފުށި ސިޓީ ކައުންސިލުން ވަނީ މި މަޝްރޫޢުގެ ދަށުން ލިބުނު މި ފުރުޞަތަށް ޝުކުރު އަދާކޮށް، ސިޓީގެ ތިމާވެށި ރައްކާތެރިކޮށް ދެމެހެއްޓުމަށް އަބަދުވެސް މަސައްކަތްކުރާނެ ކަމަށް ވިދާޅުވެފައެވެ.
މި ގަސްތައް އިންދުމުގެ ސަބަބުން ކުޅުދުއްފުށި ސިޓީގެ ރީތިކަން އިތުރުވެ، ރަށްގިރުމާއި ފެންބޮޑުވުން ފަދަ ތިމާވެށީގެ ގޮންޖެހުންތަކަށް ހައްލެއް ލިބި، ސިޓީގެ އަރާމު މާޙައުލު ރައްކާތެރިކޮށް ދެމެހެއްޓުމަށް އެހީތެރިވެދޭނެއެވެ.