ރާއްޖޭގެ ކުނި މެނޭޖްކުރުމުގެ ގައުމީ ކުންފުނި، ވެސްޓް މެނޭޖްމަންޓް ކޯޕަރޭޝަން އާއި ’މަގޭ ސާފު ރާއްޖެ ގައުމީ ކޮންފަރެންސް 2025‘ ގުޅިގެން މަސައްކަތްކުރުމަށް އެއްބަސްވެއްޖެއެވެ.
ޓުއަރިޒަމް އެންޑް އެންވަޔަރަންމަންޓު މިނިސްޓްރީން މިއަދު ބުނީ ވެމްކޯ އިން މި ކޮންފަރެންސްގެ އިވެންޓް ޕާޓްނަރެއްގެ ގޮތުގައި ބައިވެރިވާނެ ކަމަށެވެ.
މިނިސްޓްރީން ބުނީ މި އެއްބަސްވުމުގެ ދަށުން، 2025 ވަނަ އަހަރު ބޭއްވުމަށް ހަމަޖެހިފައިވާ ’މޭގެ ސާފު ރާއްޖެ ގައުމީ ކޮންފަރެންސް‘ ގެ ކަންތައްތައް ކުރިއަށްގެންދިއުމުގައި ވެމްކޯއިން މުހިއްމު ދައުރެއް އަދާކުރާނެ ކަމަށެވެ.
މި ކޮންފަރެންސް އޮންނާނީ ލ.އަތޮޅުގައި ކަމަށްވާއިރު، މިހާރުން މިހާރަށް އެކުގަައި މަސައްކަތްކުރުމަށް ވެމްކޯއިން އިއުލާންކޮށްފައިވަނީ ކޮންފަރެންސްއަށް ތައްޔާރުވުމުގެ މަސައްކަތުގެ ތެރެއިންނެވެ.
ވެމްކޯ އަކީ ރާއްޖޭގެ ކުނި މެނޭޖްކުރުމާއި، ކުނި ނައްތާލުމުގެ މަސައްކަތުގައި އެންމެ އިސް ދައުރެއް އަދާކުރާ ފަރާތްކަމުން، މި ކޮންފަރެންސަށް އެ ކުންފުނި ލިބުމަކީ ކޮންފަރެންސްގެ މަގްސަދުތައް ހާސިލްކުރުމަށް ވަރަށް ބޮޑު އެހީއަކަށް ވެގެންދާނެ ކަމެއް ކަމަށް މިނިސްޓްރީން ބުނެފައި ވެއެވެ.
’މަގޭ ސާފު ރާއްޖެ‘ މި ނަމުން ދޭހަވަނީ ރާއްޖޭގެ ތިމާވެށި ރައްކާތެރިކުރުމާއި، ސާފުތާހިރު ރާއްޖެއެއް ބިނާކުރުމަށް ކުރެވޭ މަސައްކަތްތަކެވެ.
މި ގައުމީ ކޮންފަރެންސްގެ މައިގަނޑު މަގްސަދަކީ ރާއްޖޭގެ ތިމާވެށި ރައްކާތެރިކުރުމާއި، ކުނީގެ މައްސަލަތަކަށް ހައްލު ހޯދައި، ދެމެހެއްޓެނިވި ގޮތަކަށް ސާފުތާހިރުކަން ކަށަވަރުކުރުމަށް ބޭނުންވާ މައުލޫމާތާއި ހިޔާލު ބަދަލުކުރުމެވެ.
ވެމްކޯގެ އެއްބާރުލުން ލިބުމުން، ކުނި މެނޭޖްކުރުމުގެ ދާއިރާގައި އެ ކޯޕަރޭޝަންގެ ތަޖުރިބާ މި ކޮންފަރެންސަށް ލިބި، އިތުރަށް ފުރިހަމަވެގެންދާނެ އެވެ.
މި ގުޅުން ބިނާވެފައިވަނީ ރާއްޖޭގެ ތިމާވެށި ރައްކާތެރިކުރުމާއި، ގައުމީ ފެންވަރުގައި ސާފުތާހިރުކަން ކުރިއެރުވުމަށް ދެ ފަރާތުންވެސް ދެމުންގެންދާ އިސްކަމުގެ މައްޗަށެވެ.