އަންނަ ލޯކަލް ކައުންސިލު އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބާއި މައި ދެ އިންތިޚާބު އެއްކޮށްލުމާ މެދު އާންމުންގެ ޚިޔާލު ހޯދާ ވޯޓު އެއް ދުވަހަކަށް ހަދާ ނަމަ، އިންތިޚާބުތައް އެއްކޮށްލައިގެން ބޭއްވޭނީ މިމަހުގެ 18ވަނަ ދުވަހުގެ ކުރިން ހުރިހާ މަރުހަލާއެއް ނިމުމުން ކަމަށް، އިލެކްޝަންސް ކޮމިޝަންގެ ރައީސް މުޙައްމަދު ޒާހިދު މިއަދު ވިދާޅުވެއްޖެއެވެ.
އީސީގެ ރައީސް މިހެން ވިދާޅުވެފައި މިވަނީ ރިޔާސީ އިންތިޚާބާއި މަޖިލިސް އިންތިޚާބު އެއްކޮލުމަށް އާންމުންގެ ފެންނަ ނުފެންނަ ވޯޓު، އޭޕްރިލް މަހުގެ ހަތަރުވަނަ ދުވަހު ކައުންސިލު އިންތިޚާބާ އެއްކޮށްލައިގެން ނަގާނެ ކަމަށް ގަބޫލުކުރެވޭ ކަމަށް، ޕީއެންސީގެ ޕާލިމެންޓްރީ ގުރޫޕުގެ ލީޑަރު އަދި، އިނގުރައިދޫ ދާއިރާގެ މެންބަރު އިބްރާހީމް ފަލާޙް ރޭ ވިދާޅުވެފައި ވަނިކޮށެވެ.
މައި ދެ އިންތިޚާބު އެއްކޮށްލުމަށް ގާނޫނުއަސާސީއަށް ސަރުކާރުން ހުށަހެޅި އިސްލާހާ ގުޅޭގޮތުން ބަންޑާރަނައިބުގެ އޮފީހާއި އިލެކްޝަންސް ކޮމިޝަންގެ މެންބަރުން ހާޒިރުކުރި މި ބައްދަލުވުމުގައި ވާހަކަ ދައްކަވަމުން އީސީގެ ރައީސް ޒާހިދު ވިދާޅުވީ، އެ ކޮމިޝަނުން އަބަދުވެސް މަސައްކަތްކުރަމުން އަންނާނީ ގާނޫނުއަސާސީއާއި ގާނޫނުގައި މަތިކޮށްފައިވާ ގޮތަށް ކަމަށެވެ.
އެގޮތުން މިވަގުތު ކޮމިޓީ މަރުހަލާ ނިމި، ތަޅުމަށް ފާސްކުރަން ހުށަހަޅަން ތައްޔާރުވެފައި އޮތް ރެފަރެންޑަމް ގާނޫނުގައި އޮންނަ ގޮތަށް ރައީސް ޑރ. މުޙައްމަދު މުޢިއްޒު ގަރާރެއް ނެރުއްވިޔަސް، ނުވަތަ ރައްޔިތުންގެ މަޖިލީހުން ގާނޫނު ފާސްކުރިޔަސް ގާނޫނުގައިވާ ކަންކަން ތަންފީޒުކުރާނެ ކަމަށް ޒާހިދު ވިދާޅުވިއެވެ.