ބޭންކް އޮފް މޯލްޑިވްސް (ބީއެމްއެލް) ގެ މުވައްޒަފުން ޑިޖިޓަލް ދާއިރާއިން ކުރިއެރުވުމަށާއި، ބަދަލުވަމުންދާ ޓެކްނޮލޮޖީގެ މާހައުލަށް މުވައްޒަފުން އަހުލުވެރިކުރުވުމަށްޓަކައި ދުނިޔޭގެ މަޝްހޫރު ޕޭމަންޓް ނެޓްވޯކް، މާސްޓަރކާޑާއެކު މިއަދު މުހިންމު އެއްބަސްވުމެއްގައި ސޮއިކޮށްފިއެވެ.
ބީއެމްއެލް އެކަޑަމީ އާއި މާސްޓަރކާޑާ ދެމެދު މިއަދު ސޮއިކުރެވުނު މި ފަހުމުނާމާގެ މައިގަނޑު މަޤްޞަދަކީ ހަލުވިކަމާއެކު ބަދަލުވަމުންދާ ޑިޖިޓަލް ދުނިޔޭގައި ކުރިއަރައި ދިއުމަށް ބޭނުންވާ މުހިންމު ހުނަރުތަކުން ބޭންކުގެ މުވައްޒަފުން ބައްޓަންކުރުމެވެ. މިއީ ބޭންކުގެ ޚިދުމަތްތައް ޒަމާނީކޮށް، އާ އީޖާދުތަކަށް މަގުފަހިކުރުމަށް ކުރަމުންދާ މަސައްކަތުގެ ދަށުން އެޅުނު މުހިންމު ފިޔަވަޅެކެވެ.
މި ކަމާއި ގުޅޭގޮތުން ބޭންކުން ބުނެފައިވަނީ، މާސްޓަރކާޑާއެކު ވެވުނު މި އެއްބަސްވުމުގެ ސަބަބުން ބޭންކުގެ ޑިޖިޓަލް ޓްރާންސްފޯމޭޝަން ދަތުރަށް އިތުރު ކުރިއެރުމެއް ލިބިގެންދާނެ ކަމަށެވެ. އަދި މީގެ ސަބަބުން ދިގު މުއްދަތުގެ ކުރިއެރުމަށާއި، ބޭންކިންގ ދާއިރާއަށް އަންނަ ބަދަލުތަކަށް މުވައްޒަފުން ތައްޔާރުކުރުމަށް ބޮޑު އެހީތެރިކަމެއް ލިބިގެންދާނެ ކަމަށްވެސް ބީއެމްއެލްއިން ފާހަގަކުރެއެވެ.
ބޭންކް އޮފް މޯލްޑިވްސްއަކީ ރާއްޖޭގެ އެންމެ ބޮޑު ބޭންކަށް ވީހިނދު، މުވައްޒަފުންގެ ފަންނީ ގާބިލުކަން އިތުރުކުރުމަކީ ކަސްޓަމަރުންނަށްދޭ ޚިދުމަތުގެ ފެންވަރު މަތިކުރުމަށް ބޭންކުން ދޭ ވަރަށް ބޮޑު އިސްކަމެކެވެ. މިއަދު ސޮއިކުރެވުނު މި އެއްބަސްވުމުގެ ދަށުން ކުރިއަށް ގެންދާ ތަމްރީނު ޕްރޮގްރާމްތަކުގެ ސަބަބުން، ޑިޖިޓަލް ބޭންކިންގގެ ދާއިރާއިން ދިވެހި މުވައްޒަފުންނަށް އާ އުސްމިންތަކަކަށް ވާސިލުވުމުގެ ފުރުސަތު ހުޅުވިގެންދާނެއެވެ.