އައިޖީއެމްއެޗުގައި މަސައްކަތްކުރި ފިލިޕީންސްގެ ނަރުހެއް ކަމަށްވާ މޭރީ ގްރޭސްގެ މަރުގެ މައްސަލާގައި ހައްޔަރުކޮށްފައިވާ އޭނާގެ ފިރިމީހާ، މާވިން ވާގަސް ޖަލުގައި ހުރެ އިސްލާމްވެއްޖެއެވެ.
އިސްލާމްވުމަށްފަހު އޭނާވަނީ އޭނާގެ ނަންވެސް ޔޫސުފްއަށް ބަދަލުކޮށްފައެވެ.
މާވިންއާއެކު އެ މައްސަލައިގައި ހައްޔަރުކޮށްފައިވަނީ ދިވެހި ނަރުހެއް ކަމަށްވާ ހަލީމަތު ލަމްހާއެވެ. މާވިން އިސްލާމްވެއްޖެކަން، އިސްލާމިކް މިނިސްޓްރީންވަނީ ކޯޓަށްވެސް އަންގައިފައެވެ.
އެ މައްސަލއިގައި މިއަދު ބޭއްވި އަޑުއެހުމުގައި އެ މައްސަލަ މިހާރު ބައްލަވާ ގާޒީ މުޒައްމިލު ނާސިރު ވިދާޅުވީ ޖަލު ބަންދުގައި ހުރި މާވިން އިސްލާމްދީން ގަބޫލުކޮށް، އޭނާގެ ނަން ޔޫސުފްގެ ނަމަށް ބަދަލުކޮށްފައިވާކަން އިސްލާމިކް މިނިސްޓްރީން އަންގާފައިވާ ކަމަށެވެ.
މާވިންގެ މައްޗަށް ދައުލަތުން ކުރާ ދައުވާއަކީ، އޮކްޓޫބަރު، 2021 ގައި އޭނާގެ އަނބިމީހާ މޭރީ މަރާލި ކަމުގެ ތުހުމަތުގައި ކުރާ، އެނގިހުރެ މީހަކު މެރުމުގެ ދައުވާއެވެ. މާވިންގެ ލޯބިވެރިޔާ ލަމްހާގެ މައްޗަށް ކުރަނީ އެކަމުގައި ބައިވެރިވުމުގެ ދައުވާއެވެ.
މި މައްސަލައިގައި މިއަދު އޮތީ ޚުލާސާ ބަޔާން އިއްވުމެވެ. އެކަމަކު ބައެއް ލިޔުންތައް ނުލިބޭތީ އަންނަ މަހަށް ޚުލާސާ ބަޔާން އިއްވުން ވަނީ ފަސްކޮށްފައެވެ.
މީގެކުރިން މާވިން އާއި ލަމްހާގެ މައްސަލަ ވަކިން ކުރިއަށް ގެންދިޔަ ނަމަވެސް، މިހާރު ޝަރީއަތް ކުރިއަށް ގެންދަނީ އެއްކޮށެވެ. އަދި މިއަދު ޝަރީއަތަށް އެ ދެ މީހުން ހާޒިރުކޮށްފައިވަނީ ވެސް އެއްކޮށެވެ.
އައިޖީއެމްއެޗްގައި މަސައްކަތް ކުރަމުންދިޔަ ފިލިޕީންސްގެ ނަރުހެއް ކަމަށްވާ މޭރީ ގްރޭސްގެ މަރުގެ މައްސަލައިގައި ދައުވާލިބޭ އޭނާގެ ފިރިމީހާ މާވިންގެ ދިފާއުގައި ހެކިބަސްދޭން އޭނާގެ ރައްޓެހިންނަށް ދިން ފުރުސަތުގައި ދެވަނަ ފަހަރަށްވެސް ނައުމުން، އެ މީހުންގެ ހެކިބަހާ ނުލައި މައްސަލަ ކުރިއަށް ގެންދަން ކޯޓުން އޮތީ ކުރިން ނިންމައިފައެވެ.