އިންޑޮނޭޝިއާގައި، އުމުރުން 16 އަހަރުން ދަށުގެ ކުދިން ސޯޝަލް މީޑިއާގެ ޕްލެޓްފޯމްތަކަށް ވަނުން މަނާކުރާނެ ކަމަށް އެ ގައުމުގެ ކޮމިއުނިކޭޝަން އެންޑް ޑިޖިޓަލް މިނިސްޓްރީން އިއްޔެ ބުނެފިއެވެ.
އިންޑޮނޭޝިއާގެ ކޮމިއުނިކޭޝަންސް އެންޑް ޑިޖިޓަލް މިނިސްޓަރު މެއުތުޔާ ހާފިދު ދިން ވީޑިއޯ ބަޔާނެއްގައި ބުނެފައިވަނީ، އިއްޔެ ނެރުނު ގަވާއިދެއްގެ ދަށުން 16 އަހަރުން ދަށުގެ ކުދިންނަށް ސޯޝަލް މީޑިއާ އެކައުންޓްތަކަށް ވަނުން ހަނި ވާނެ ކަމަށެވެ.
އަދި މި މަހުގެ 28 އިން ފެށިގެން ”ހައި ރިސްކް ޕްލެޓްފޯމްތަކުގައި“ 16 އަހަރުން ދަށުގެ ކުދިންގެ އެކައުންޓްތައް މަޑުމަޑުން ޑިއެކްޓިވޭޓް ކުރާނެ ކަމަށް ވެސް މެއުޓިއާ ބުންޏެވެ. އެ ޕްލެޓްފޯމްތަކުގެ ތެރޭގައި ޓިކްޓޮކް، ފޭސްބުކް، އިންސްޓަގްރާމް، އަދި ރޮބްލޮކްސް ހިމެނެއެވެ.
”މި ފިޔަވަޅުގެ މަޤުސަދު ވަރަށް ސާފު. ސޯޝަލް މީޑިއާގެ ސަބަބުން އަހަރުމެންގެ ކުޑަކުދިން އަންނަނީ ދުވަހުން ދުވަހަށް ނުރައްކަލުގެ ތެރެއަށް ވެއްޓެމުން. އޭގެތެރޭގައި ޕޯނޮގްރަފީ، ސައިބަރ ބުލީއިންގް، އޮންލައިންކޮށް ހިންގާ ފްރައުޑުތައް އަދި ވަކިން ޚާއްސަކޮށް އެޑިކްޝަންތައް ހިމެނޭ. މިފަދަ ކަންކަމުން ކުދިން ސަލާމަތް ކުރަން ދެން ހަމައެކަނި މައިންބަފައިންނަށް މަސައްކަތް ކުރާކަށް ނުޖެހޭނެ. ސަރުކާރުން ވެސް އެހީވާނެ“ މެއުޓިއާ ބުނެފައިވެއެވެ.
އިންޑޮނޭޝިއާ ވެގެންދާނީ ހުޅަނގުގެ ގައުމުތައް ފިޔަވައި މިފަދަ ހުރަސްތައް އަޅާ ފުރަތަމަ ގައުމަށް ކަމަށް ވެސް އޭނާ ވިދާޅުވިއެވެ.
ގާތްގަނޑަކަށް 280 މިލިއަން މީހުން ދިރިއުޅޭ ގައުމެއް ކަމަށްވާ އިންޑޮނޭޝިއާގައި އިންޓަނެޓް ބޭނުންކުރާ މިންވަރު 79.5 ޕަސެންޓަށް އަރާފައިވާ ކަމަށް އިންޑޮނޭޝިއާގެ އިންޓަނެޓް ޚިދުމަތްދޭ ޖަމިއްޔާއިން 8،700 މީހުން ބައިވެރިކޮށްގެން ކުރި ދިރާސާއަކުން ދައްކައެވެ.
ކުޑަ ކުދިންގެ ސަލާމަތާއި ނަފްސާނީ ދުޅަހެޔޮކަމާއި ސޯޝަލް މީޑިއާ އިން ކުރަމުންދާ އަސަރުތަކާ ގުޅިގެން ގިނަ ގައުމުތަކަކުން މިހާރު ވެސް ވަނީ ކުޑަ ކުދިންނަށް ސޯޝަލް މީޑިއާ ބޭނުންކުރުން ހުއްޓުވާފައެވެ.
އެގޮތުން އޮސްޓްރޭލިއާ އިން ޑިސެމްބަރު މަހު 16 އަހަރުން ދަށުގެ ކުދިންނަށް ސޯޝަލް މީޑިއާ ބޭނުންކުރުން މަނާކުރިއިރު، ސްޕެއިން އިން ވެސް މިދިޔަ މަހު ވަނީ 16 އަހަރުން ދަށުގެ ކުދިންނަށް ސޯޝަލް މީޑިއާ ބޭނުންކުރުން މަނާކުރާނެ ކަމަށް ބުނެފައެވެ.