މެދުއިރުމަތީގައި މިހާރު ކުރަމުންދާ ހަނގުރާމައާ ގުޅިގެން، ވައިގެ ސަރަހައްދު ބަންދުކުރި ޤަތަރުން ވެސް، ވައިގެ ސަރަހައްދުން ބައެއް ހުޅުވާލަން ނިންމައިފިއެވެ.
ޤަތަރުގެ ސިވިލް އޭވިއޭޝަން އޮތޯރިޓީން ނެރުނު ބަޔާނެއްގައި ބުނެފައިވަނީ، ޚާއްސަ، ވަގުތީ ނެވިގޭޝަން ރޫޓްތަކެއް ކަނޑައަޅައި ލިމިޓެޑް އޮޕަރޭޝަނަލް ކެޕޭސިޓީއެއްގައި ވައިގެ ބައެއް ދަތުރުތައް ފަށަން ނިންމާފައިވާކަން އިއުލާނުކުރާ ކަމަށެވެ.
”މި މަރުހަލާގައި އޮޕަރޭޓްކުރާނީ ތާށިވެފައި ތިބި ފަސިންޖަރުން އުފުލުމަށާއި އެއާ ކާގޯގެ ފްލައިޓްތަކަށް،“ ބަޔާނުގައިވެއެވެ.
ރައްކާތެރިކަމުގެ ޔަގީންކަން ބޮޑު ގަލްފުގެ ގައުމުތަކަށް ގޮސް ތިބި އެތައް ދަތުރުވެރިންނަކަށް ވަނީ އީރާންގެ ރައްދު މިސައިލް އަދި ޑްރޯން ހަމަލާތަކާ އެކު ގަލްފުގެ ގައުމުތައް ބިރުވެރި މަންޒިލްތަކަށް ބަދަލުވެފަ އެވެ. އަދި އެތައް ހާސް ބަޔަކު އެކި ގައުމުތަކުގައި ވަނީ ތާށިވެފައެވެ.
ޤަތަރު އެއާވޭސް އިން ނެރުނު ބަޔާނެއްގައި ބުނީ ރައްކާތެރި ކޮރިޑޯއެއް ގާއިމްކުރުމަށް ފަހު އެ އެއާލައިނުން ލަންޑަން، ޕެރިސް، މެޑްރިޑް، ރޯމް އަދި ފްރޭންކްފާޓަށް ދަތުރުކުރާނެ ކަމަށެވެ.
ތާށިވެފައި ތިބި އާއިލާތަކާއި އުމުރުން ދުވަސްވީ ފަސިންޖަރުންގެ އިތުރުން ސިއްހީ ފަރުވާއަށް ބޭނުންވާ މީހުންނަށް މި ފްލައިޓުތަކުގައި އިސްކަން ދޭނެ ކަމަށް ވެސް އެ ބަޔާނުގައި ބުނެފައިވެއެވެ.