ދ. ކުޑަހުވަދޫ މަގު ހެދުމުގެ މަޝްރޫއުގެ މަސައްކަތް ވަރަށް ހަލުވި ދުވެއްޔެއްގައި ކުރިއަށްދާ ކަމަށް ރޯޑް ޑިވެލޮޕްމެންޓް ކޯޕަރޭޝަން (އާރްޑީސީ) އިން މިއަދު ހާމަކޮށްފިއެވެ.
އާރްޑީސީއިން އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ މި މަޝްރޫއުގެ ދަށުން މިހާރު ދޮށިމޭނާ މަގުގައި ބެކްފިލިންގ އަދި ލެވެލިންގގެ މަސައްކަތް ކުރިއަށްދާ ކަމަށެވެ. އަދި ހަމައެއާއެކު، ސިއްތިމާވަރަނި ހިނގުމުގައި ސްޓޯމް ވޯޓަރ ނެޓްވޯކް އެޅުމަށްޓަކައި މަގު ކޮނުމުގެ މަސައްކަތްވެސް ކުރިއަށްދާ ކަމަށް އާރްޑީސީއިން ފާހަގަކޮށްފައިވެއެވެ.
ކުޑަހުވަދޫ މަގުހެދުމުގެ މަޝްރޫއުގެ މަސައްކަތަށް އާރްޑީސީއާއެކު ސަރުކާރުން އެއްބަސްވުމުގައި ސޮއިކޮށްފައިވަނީ 2021 ވަނަ އަހަރުގެ ސެޕްޓެމްބަރު މަހުގެ ފަހުކޮޅުގައެވެ. މި އެއްބަސްވުމުގެ ދަށުން ކުޑަހުވަދޫގެ 5.85 ކިލޯމީޓަރުގެ މަގުތަކުގައި ތާރުއެޅުމާއެކު، ފެންހިންދާ ނިޒާމު ޤާއިމްކޮށް، އަދި މަގުބައްތި ހަރުކުރުމަށް ވަނީ ނިންމާފައެވެ.
މި މަޝްރޫއު ފުރިހަމަވުމުން ކުޑަހުވަދޫގެ މަގުތަކުގެ ހާލަތު ރަނގަޅުވެ، ރަށުގެ ރައްޔިތުންނަށް ފަސޭހަކަމާއެކު ދަތުރުފަތުރު ކުރެވޭނެ ކަމަށް އުންމީދު ކުރެވެއެވެ. އަދި މިކަމުގެ ސަބަބުން ރަށުގެ ތަރައްޤީއަށް އިތުރު ކުރިއެރުންތަކެއް ލިބިގެންދާނެ ކަމަށްވެސް ބެލެވެއެވެ.