ބ. އަތޮޅުގައި މީހުން ދިރިއުޅޭ ރަށްތަކަށް ޒިޔާރަތްކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ހެނދުނު ފެއްޓއވި ދަތުރުފުޅުގެ ތެރެއިން އެ އަތޮޅު ކަމަދޫއަށް ވަޑައިގެންފިއެވެ.
ދަރަވަންދޫ އެއާޕޯޓަށް ވަޑައިގަތުމަށްފަހު، ކަމަދޫއަށް ރައީސް ވަޑައިގެންނެވީ ރިޔާސީ ލޯންޗުކޮޅުގައެވެ.
އެމަނިކުފާނަށް ދަރަވަންދޫ އެއާޕޯޓުންނާއި ކަމަދޫން ވެސް ސަރުކާރުގެ އިސްވެރިންނާއި ރަށުގެ ގިނަ ރައްޔިތުން ވަނީ ހޫނު މަރުހަބާއެއް ކިޔާފައެވެ.
ރައީސް މުޢިއްޒުގެ މި ދަތުރުފުޅުގައި ބ. އަތޮޅުގެ މީހުން ދިރިއުޅޭ ރަށްރަށަށް ޒިޔާރަތްކުރައްވައި، ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކާ ބައްދަލުކުރައްވައި، އެ ރަށްރަށުގެ ތަރައްޤީއަށް ބޭނުންވާ ކަންކަމާއި ރައްޔިތުން އެންމެ އެދޭ ކަންކަމާ ގުޅޭގޮތުން މަޝްވަރާ ކުރައްވާނެއެވެ. އަދި ރަށްރަށުގެ ރައްޔިތުންނާ ބައްދަލުކުރައްވައި، އެ ރައްޔިތުންގެ ހާލު ބައްލަވާނެއެވެ.
މި ދަތުރުފުޅުގައި، އެ އަތޮޅުގެ މީހުން ދިރިއުޅޭ 13 ރަށަށް ރައީސް މުޢިއްޒު ވަޑައިގަތުމަށް ހަމަޖެހިފައިވެއެވެ. އެއީ:
° ކަމަދޫ
° ކުޑަރިކިލު
° ކެންދޫ
° އޭދަފުށި
° ތުޅާދޫ
° ގޮއިދޫ
° ފެހެންދޫ
° ފުޅަދޫ
° ހިތާދޫ
° ކިހާދޫ
° ދޮންފަން
° ދަރަވަންދޫ
° މާޅޮސް
ރައީސްގެ މި ދަތުރުފުޅަކީވެސް ރާއްޖޭގެ ހުރިހާ އަތޮޅަކަށް ޒިޔާރަތްކުރެއްވުމަށާއި، އަތޮޅުތަކާއި ރަށްތަކާއި ސިޓީތަކުގެ ކައުންސިލުތަކާ ބައްދަލުކުރެއްވުމަށް ކުރިއަށްގެންދަވާ ސިލްސިލާ ދަތުރުފުޅުތަކުގެ ތެރޭގައި ހިމެނިގެން އެމަނިކުފާނު ކުރައްވާ ދަތުރުފުޅެކެވެ.
ބައެއް ވަޒީރުންނާއި ސަރުކާރުގެ ބައެއް މުއައްސަސާތަކުގެ އިސްވެރިން މި ދަތުރުފުޅުގައި، ރައީސުލްޖުމްހޫރިއްޔާގެ އަރިހުގައި ބައިވެރިވެވަޑައިގަންނަވައެވެ.