އެމެރިކާއިން ހުށަހެޅި އެއްވެސް ޝަރުތަކާ ނުލާ އަމާންދިނުމުގެ ހުށަހެޅުމަށް އިރާނުގެ ރައީސް މަސްއޫދު ޕެޒެޝްކިއަން މިއަދު އިންކާރު ކުރައްވައިފިއެވެ.
އޭނާ ވިދާޅުވީ، އަމާން ދިނުމަކީ އެމެރިކާއިން ދެކޭ ހިޔާލީ ހުވަފެނެއް ކަމަށާއި ދުވަހަކުވެސް އެކަން ނުވާނެ ކަމަށެވެ.
ދައުލަތުގެ ޓީވީ މެދުވެރިކޮށް ދެއްވި ބަޔާނެއްގައި، އަވަށްޓެރި ގައުމުތަކަށް އިރާނުން ދިން ހަމަލާތަކަށް ރައީސް ޕެޒެޝްކިއަން ވަނީ މައާފަށް އެދިވަޑައިގެންފައެވެ. އަދި އެފަދަ ހަމަލާތައް ހުއްޓާލާނެ ކަމަށް ވިދާޅުވެ، އެއީ އަސްކަރިއްޔާގެ ތެރޭގައި މުއާސަލާތީ ގޮތުން އެރި އޮޅުމެއްގެ ސަބަބުން ހިނގި ކަމެއް ކަމަށް ފާހަގަކުރެއްވި އެވެ.
މި ބަޔާން ދެއްވާފައިވަނީ ރޭ ފަތިހު ބަހްރޭން، ސައުދީ އަރަބިއްޔާ އަދި ޔުނައިޓެޑް އަރަބް އެމިރޭޓްސް ހިމެނޭހެން ގަލްފުގެ ބައެއް ގައުމުތަކަށް އިރާނުން މިސައިލް ހަމަލާތަކެއް ދީފައިވާ ދަނޑިވަޅެއްގަ އެވެ. ހަމަ އެއާ އެކު، އެމެރިކާ އާއި އިޒްރޭލުން ގެންދަނީ އިރާނުގެ އެކި އަމާޒުތަކަށް ވައިގެ މަގުން ހަމަލާދެމުންނެވެ.