ހުޅުމާލޭގައި 3000 ހައުސިން ޔުނިޓް އެޅުމަށް ހަވާލުކުރުމުން، މަކަރާއި ޙީލަތުން ގިނަ ބައެއްގެ އަތުން ފައިސާ ނަގައި ޚިޔާނާތްތެރިވިކަމުގެ ތުހުމަތުގައި ސީލައިފްގެ ޑިރެކްޓަރު އަޙްމަދު މޫސާ މުޙައްމަދު (އަންމަޓީ)ގެ މައްޗަށް އުފުލި 42 ދަޢުވާ ސާބިތުނުވާކަމަށް ކްރިމިނަލް ކޯޓުން މިއަދު ޙުކުމް ކޮށްފިއެވެ.
ކްރިމިނަލް ކޯޓުން މި މައްސަލައިގައި މިއަދު ޙުކުމްކޮށްފައިވަނީ، އަންމަޓީގެ މައްޗަށް ދައުލަތުން އުފުލާފައިވާ ޚިޔާނާތްތެރިވުމުގެ ކުށުގެ ދަޢުވާތަކަކީ މަދަނީ ޠަބީޢަތުގެ ދަޢުވާތަކެއް ކަމަށް ކަނޑައެޅުމަށްފަހުގައެވެ. ނަމަވެސް ޕީޖީ އޮފީހުން ބުނެފައިވަނީ އެ ނިންމުމާ މެދު ހިތްހަމަނުޖެހޭ ކަމަށާއި، އެއީ ޖިނާއީ ކުށުގެ އުންސުރުތައް ފުރިހަމަވާ މައްސަލައެއް ކަމަށެވެ.
އެހެންވެ ހައިކޯޓުގައި މި މައްސަލަ އިސްތިއުނާފުކުރަން ޕީޖީ އޮފީހުން ވަނީ ނިންމައިފައެވެ.
ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ) އާއި ސީލައިފް ގްލޯބަލްއާ ދެމެދު ވެފައިވާ އެއްބަސްވުމެއްގެ ދަށުން ހުޅުމާލޭގައި 3000 ހައުސިން ޔުނިޓް އެޅުމަށް އެ ކުންފުންޏާ ހަވާލުކޮށް، އެއްބަސްވުމުގައި ސޮއިކުރީ 13 މާރިޗު 2014 ގައެވެ. ނަމަވެސް، އެއްބަސްވުމުގައިވާ މުއްދަތުގެ ތެރޭގައި ޢަމަލީ މަސައްކަތް ފުރިހަމަނުކޮށް، އެޕާޓްމަންޓްތައް ވިއްކާނެކަމަށް ބުނެ 280 އަށްވުރެ ގިނަ މީހުންގެ އަތުން ބުކިން ފީގެ ގޮތުގައި 50،000 ރުފިޔާގެ މަގުން، ޖުމްލަ 14 މިލިއަނަށްވުރެ ގިނަ ރުފިޔާ ނަގާފައިވެއެވެ. މަސައްކަތް ކުރިއަށް ނުދިއުމުގެ ސަބަބުން 2015 ވަނަ އަހަރުގެ ސެޕްޓެމްބަރު މަހު އެޗްޑީސީން ވަނީ އެއްބަސްވުން ބާޠިލުކޮށްފައެވެ.
މި ފައިސާއަށް ޚިޔާނާތްތެރިވިކަމުގެ ތުހުމަތުގައި، ޚިޔާނާތްތެރިވުމުގެ ކުށުގެ 42 ދަޢުވާއެއް ދައުލަތުން ކްރިމިނަލް ކޯޓަށް ހުށަހެޅީ 30 މޭ 2021 ގައެވެ. މި މައްސަލައިގެ ތަޙުޤީޤު މަރުޙަލާގައި އަންމަޓީ ފިލައިގެން ސްރީލަންކާގައި އުޅެނިކޮށް، 2019 ވަނަ އަހަރު އިންޓަޕޯލް ރެޑް ނޯޓިސް ނެރެގެން އޭނާ ހައްޔަރުކޮށްގެން ރާއްޖެ ގެނެސްފައިވަނީ 2021 ވަނަ އަހަރުގެ މާރިޗު މަހުގައެވެ. އޭގެ ފަހުން ޝަރީޢަތް ނިމެންދެން ބަންދުކުރުމާއި، ޞިއްޙީ ސަބަބުތަކަށްޓަކައި ކަފާލާތުގެ ދަށުން ދޫކޮށްލުމުގެ އެތައް މަރުޙަލާތަކެއް ކޯޓުތަކުގައި ހިނގާފައިވެއެވެ.
މި 42 ދަޢުވާ ސާބިތުވިނަމަ އޭނާގެ މައްޗަށް 65 އަހަރުގެ ޖަލު ޙުކުމެއް އައުމުގެ ފުރުޞަތު އޮތެވެ.
މި މައްސަލައިގެ ޝަރީޢަތް ހިންގުމަށްފަހު، ކްރިމިނަލް ކޯޓުން މިއަދު އިއްވި ޙުކުމުގައި މައިގަނޑު ގޮތެއްގައި ފާހަގަކޮށްފައިވަނީ، ދައުލަތުން އުފުލާފައިވާ ދަޢުވާތަކަކީ މަދަނީ ޠަބީޢަތުގެ މުޢާމަލާތްތަކަކާ ގުޅޭ ދަޢުވާތަކެއް ކަމަށެވެ. އަދި އަންމަޓީގެ މި ޢަމަލުތަކާ ގުޅިގެން ފިޔަވަޅު އަޅަންޖެހޭނީ މަދަނީ ޢަދުލުގެ ނިޒާމުގެ ތެރެއިންކަމަށް މައްސަލަ ބެއްލެވި ފަނޑިޔާރަށް ފެނިވަޑައިގަންނަވާކަމަށް ޙުކުމުގައި ބަޔާންކޮށްފައިވެއެވެ.
ނަމަވެސް، ޕީޖީ އޮފީހުން މިއަދު ނެރުނު ނޫސްބަޔާނެއްގައި ބުނެފައިވަނީ، އަންމަޓީގެ މައްޗަށް ކޮށްފައިވާ ދަޢުވާތަކަކީ ޤާނޫނުލްޢުޤޫބާތުގެ 215 ވަނަ މާއްދާގައި ބަޔާންކުރާ ޚިޔާނާތްތެރިވުމުގެ ކުށުގެ އުންސުރުތައް ފުރިހަމަވާ ދަޢުވާތަކެއްކަމަށް އެ އޮފީހުން ގަބޫލުކުރާ ކަމަށެވެ. ކްރިމިނަލް ކޯޓުން މިއީ މަދަނީ މައްސަލައެއްކަމަށް ނިންމާފައިވަނީ، ދަޢުވާތައް ސާބިތުކުރުމަށް ކޯޓަށް ހުށަހެޅި ހެކިތަކަށް އެކަށީގެންވާ މިންވަރަށް ރިޢާޔަތްކުރުމާ ނުލައި ކަމަށް ޕީޖީ އޮފީހުން ފާހަގަކުރެއެވެ. އަދި އެ ނިންމުމަކީ ޤާނޫނުގައި ޚިޔާނާތްތެރިވުމުގެ ކުށް ބަޔާންކޮށްފައިވާ ގޮތަށް ރަނގަޅުނޫން މާނަކުރުމެއް ދީގެން ނިންމާފައިވާ ނިންމުމެއްކަމަށްވެސް ދައުލަތުން ދެކެއެވެ.
އެހެންކަމުން، މި މައްސަލައިގައި ކްރިމިނަލް ކޯޓުން ނިންމި ނިންމުން ބާޠިލުކުރުމަށް އެދި، ޤާނޫނުގައި ކަނޑައެޅިފައިވާ މުއްދަތުގެ ތެރޭގައި ދިވެހިރާއްޖޭގެ ހައިކޯޓަށް ހުށަހެޅުމުގެ މަސައްކަތް ޕީޖީ އޮފީހުން މިހާރު ދަނީ ކުރަމުންނެވެ. ދަށު ކޯޓުގެ ނިންމުން އިސްތިއުނާފު ކުރުމަށް ދައުލަތަށް ލިބެނީ މަދު ދުވަސްކޮޅެއް ކަމަށްވާއިރު، ހައިކޯޓަށް މައްސަލަ ހުށަހެޅުމުން، އިސްތިއުނާފު ބަލައިގަތުމާމެދު އެ ކޯޓުން ގޮތެއް ނިންމާނެއެވެ.
2 Comments
ތިކަހަލަ މިކަރުވެރި ބޮޑެތިވަގުން އަބަދުވެސް ސަލާމަތްވާނެ. ރާއްޖޭގަ ބޮޑެތި ކުއްވެރިންގެ ހިސްޓްރީބަލާލާ.
ތިއީދެން އާކަމެއްނޫން! ތިހާގިނަފައިސާ އެއްނުނެގޭނެ ސަރުކާރުގެ ނުފޫޒުގަދަ ބާރުވެރި އެހެން އަތެއް ތިޖަރީމާގައި ބައިވެރިނުވެ. އެހެންވީމާ ސަލާމަތްވާނެ!