ނ. ވެލިދޫގައި ޑައިލިސިސްގެ ޚިދުމަތް އަންނަ މަހު ފެށުމަށް ހަމަޖެހިފައިވާ ކަމަށް ހެލްތު މިނިސްޓަރ އަބްދުﷲ ނާޒިމް އިބްރާހިމް ވިދާޅުވެއްޖެއެވެ.
މިނިސްޓަރު މިހެން ވިދާޅުވީ އިއްޔެ ރޭ އެމްއެމްޓީވީއަށް ދެއްވި ޚާއްޞަ އިންޓަވިއުއެއްގައެވެ.
ކިޑްނީގެ ބަލިތަކަށް ފަރުވާ ހޯދަމުންދާ ފަރާތްތަކަށް އިތުރު ފަސޭހަތަކެއް ހޯދައިދިނުމުގެ މަޤްޞަދުގައި، ދިވެހިރާއްޖޭގެ އެކި އަތޮޅުތަކުގައި ހުރި ޞިއްޙީ މަރުކަޒުތަކާއި ހޮސްޕިޓަލްތަކުގައި ޑައިލިސިސްގެ ޚިދުމަތް ޤާއިމްކުރުމަށް ސަރުކާރުން ގިނަގުނަ މަސައްކަތްތަކެއް ކުރަމުންދާކަން މިނިސްޓަރު މި އިންޓަވިއުގައި ވިދާޅުވެފައިވެއެވެ.
މިނިސްޓަރ ވިދާޅުވިގޮތުގައި، ޑައިލިސިސްގެ ޚިދުމަތަށް ބޭނުންވާ މީހުން ގިނަ ރަށްރަށަށް އިސްކަންދީގެން މި ޚިދުމަތް ފުޅާކުރެވެމުން ދާނެއެވެ.
”މިގޮތުން ހއ. އިހަވަންދޫގައި އަލަށް މި ޚިދުމަތް ފެށިފައިވާއިރު، ނ. އަތޮޅުގައި ޑައިލިސިސް އެނދުގެ އަދަދު އިތުރުކުރެވި، ގއ. ވިލިނގިލީގައިވެސް މިހާރު މި ޚިދުމަތް ލިބެމުންދާނެ. އަދި ކުރިއަށް އޮތް މަހުގެ ތެރޭގައި ނ. ވެލިދޫގައިވެސް މި ޚިދުމަތް ފެށޭނެކަމަށް އުއްމީދުކުރެވޭ.“ މިނިސްޓަރު ވިދާޅުވިއެވެ.
މިނިސްޓަރ ނާޒިމް އިތުރަށް ފާހަގަކުރެއްވި ގޮތުގައި، ކިޑްނީގެ ބަލިތަކަށް ފަރުވާ ހޯދާ ގިނަ ބަޔަކު ކޮންމެ ދުވަހަކު ޑައިލިސިސްގެ ޚިދުމަތް ހޯދަން ޖެހެއެވެ.
އެހެންކަމުން، އެހެން ރަށްރަށަށް ދަތުރުކޮށްގެން މި ޚިދުމަތް ހޯދުމަށް ރައްޔިތުން ކުރަންޖެހޭ ޚަރަދު ކުޑަކުރުމަކީ ސަރުކާރުގެ މައިގަނޑު އެއް އަމާޒު ކަމަށް މިނިސްޓަރު ނާޒިމްވި ދާޅުވިއެވެ.