އައްޑޫ އިކްއެޓޯރިއަލް ހޮސްޕިޓަލް (އޭއީއެޗް) އިން ނޭވާލާ ނިޒާމަށް ޖެހޭ ބަލިތައް މަދުވެފައިވާތީ، އެ ހޮސްޕިޓަލުގައި ހިންގަމުން އައި ފްލޫ ކްލިނިކް ބަންދުކުރުމަށް ނިންމައިފިއެވެ.
އައްޑޫގައި ފްލޫ ކްލިނިކް ހުޅުވީ މިދިޔަ މަސްތަކުގައި އަރިދަފުސް ރޯގާ އާއި އިންފްލުއެންޒާގެ ކޭސްތައް އިތުރުވެގެން ދިޔުމާ ގުޅިގެން، ބަލިމީހުންނަށް ފަސޭހަ ކުރުމުގެ ގޮތުންނެވެ.
ނަމަވެސް މިހާރު މި ބަލިތައް ބޮޑުތަނުން މަދުވެފައިވާތީ އަންނަ އާދީއްތަ ދުވަހުން ފެށިގެން ހޮސްޕިޓަލުން ބަންދުކުރަން ނިންމާފައިވާ ކަމަށް ހޮސްޕިޓަލުން ބުންޏެވެ.
ފްލޫ ކްލިނިކް ބަންދުކުރި ނަމަވެސް، ނޭވާލާ ނިޒާމުގެ އަލާމާތްތައް ހުންނަ ބަލިމީހުންނަށް ޚިދުމަތް ލިބޭނެ އިންތިޒާމު ހަމަޖެހިފައިވާކަން ހޮސްޕިޓަލުން ފާހަގަކޮށްފައިވެއެވެ. މިގޮތުން ހުމާއި، ކެއްސުން، ކަރުތެރެ ރިއްސުން، އަދި ނޭވާލާން އުނދަގޫވުން ފަދަ އަލާމާތްތައް ހުންނަ ބަލިމީހުންނަށް ހޮސްޕިޓަލުގެ އޯޕީޑީން ޚިދުމަތް ލިބޭނެއެވެ.
އައްޑޫގައި ނޭވާލާ ނިޒާމުގެ ބަލިތައް އިތުރުވެގެން ދިޔުމާ ގުޅިގެން، ރައްޔިތުންނަށް އަވަސް ޚިދުމަތެއް ފޯރުކޮށްދިނުމުގެ މަޤްޞަދުގައި ޤާއިމުކުރެވުނު މި ކްލިނިކުން، ގިނަ އަދަދެއްގެ ބަލިމީހުންނަށް ޚިދުމަތް ދެވިފައިވާކަން ހޮސްޕިޓަލުން ފާހަގަކުރެއެވެ.