އިންޑިއާގެ އަންދްރަޕްރަދޭޝް ސްޓޭޓްގެ ކަސިބުއްގާ ސަރަހައްދުގައި ހުންނަ ޝްރީކަކުލަމް ފައްޅީގައި އިއްޔެ ހެނދުނު ހިނގި ފިތިބާރުވުމުގެ ހާދިސާގައި 9 މީހުން މަރުވެ، 15 މީހުން ޒަހަމްވެއްޖެއެވެ.
މި ހާދިސާ ހިނގާފައިވަނީ އަޅުކަން ކުރުމަށް ގިނަ އަދަދެއްގެ މީހުން އެއްވުމުގެ ސަބަބުން ކަމަށް ފުލުހުން ބުނެއެވެ.
ފުލުހުންގެ މައުލޫމާތު ދޭ ގޮތުގައި، މި ހާދިސާ ހިނގި ޝްރީކަކުލަމް ފައްޅިއަކީ މިހާރުވެސް ހަދަމުން އަންނަ ތަނެކެވެ. އެތަނުގައި އަޅުކަން ކުރުމަށް އިއްޔެ 2,000 މީހުންނަށް އެންގިފައިވީ ނަމަވެސް، އެކަމަށް 20,000 އަށް ވުރެ ގިނަ މީހުން ޖަމާވިއެވެ. މި މިންވަރަށް މީހުން އިތުރުވުމުގެ ސަބަބުން ފައްޅީގެ ސަލާމަތީ އިންތިޒާމުތައް ބެލެހެއްޓުމަށް ދަތިތަކާ ކުރިމަތިވިއެވެ.
ފައްޅީގެ އިދާރީ މުވައްޒަފެއް ކަމަށްވާ ހަރީ މުކުންދު ޕަންޑާ ބުނީ، މިހާ ގިނަ އަދަދެއްގެ މީހުން އަންނާނެ ކަމަށް އުންމީދު ނުކުރާ ކަމަށާއި، އެހެންކަމުން ސަލާމަތީ ކަންކަން ބެލެހެއްޓުމަށް ފުލުހުންނަށް އެންގިފައި ނުވާ ކަމަށެވެ.
މި ހާދިސާއާ ގުޅިގެން ޗީފް މިނިސްޓަރ ޗަންދުރަބާބޫ ވިދާޅުވީ، ކަންކަން ކުރީބައިގައި ރަނގަޅަށް އިންތިޒާމު ކުރެވުނު ނަމަ މިފަދަ ހިތާމަވެރި ހާދިސާއެއް ނުހިނގީސް ކަމަށެވެ.
މަންޒަރު ދުށް މީހަކު ބުނެފައިވާ ގޮތުގައި، ފައްޅިއަށް ވަނުމަށާއި ނިކުތުމަށް ބޭނުންކުރެވުނީ އެންމެ މަގެކެވެ. ބޭރަށް ނިކުންނަން އުޅުނު މީހުން ގަދަ ބާރުން ނިކުންނަން މަސައްކަތް ކުރުމުގެ ތެރޭގައި، އެތެރެއަށް ވަންނަން އައި މީހުން ސިޑިން ވެއްޓި، ފިތިބާރުވުން ކުރިމަތިވީއެވެ. މިއީ ހާދިސާގައި އެތައް ބަޔަކަށް ގެއްލުންވުމުގެ މައިގަނޑު ސަބަބެވެ.
މި ހާދިސާގައި މަރުވި މީހުންގެ ހަށިގަނޑުތައް ވަނީ ދެނެގަނެ، ޕޯސްޓްމޯޓަމް ހެދުމަށްފަހު އާއިލާތަކާ ހަވާލުކޮށްފައެވެ.
އިންޑިއާގެ ބޮޑުވަޒީރު ނަރެންދުރަ މޯދީ ވަނީ މި ހާދިސާގައި މަރުވި ކޮންމެ މީހަކަށް ދެ ލައްކަ ރުޕީސް (200,000 ރުޕީސް) އަދި ޒަހަމްވި ކޮންމެ މީހަކަށް ބައި ލައްކަ ރުޕީސް (50,000 ރުޕީސް) ގެ ބަދަލު ފައިސާ ދިނުމަށް ނިންމަވާފައެވެ.