މި ސަރުކާރުގެ ފާއިތުވި ދެ އަހަރުގެ ތެރޭގައި ދަރިވަރުންގެ މަތީ ތަޢުލީމުގެ ލޯނުގެ ގޮތުގައި 1 ބިލިޔަނަށްވުރެ ގިނަ ރުފިޔާ ދޫކޮށްފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ މިއަދު ފާހަގަކުރަމުންދާ ބައިނަލްއަޤްވާމީ ތަޢުލީމީ ދުވަހާ ގުޅުވައިގެން ސޯޝަލް މީޑިއާގައި ހިއްސާ ކުރެއްވި ޕޯސްޓެއްގައެވެ.
ރައީސް ވިދާޅުވީ ތަޢުލީމަކީ ދެމެހެއްޓެނިވި ތަރައްޤީއާއި ދުނިޔޭގެ ކުރިއެރުމުގެ ބިންގާ ކަމަށާއި، މި ސަރުކާރުން ތަޢުލީމަކީ ޤައުމީ ތަރައްޤީގެ އެންމެ މުހިންމު އެއް ތަނބު ކަމުގައި ކަނޑައަޅާފައިވާ ކަމަށެވެ.
އަދި ތަޢުލީމީ ނިޒާމަކީ އެންމެންގެ ބައިވެރިވުން ހިމެނޭ، ބަދަލުތަކެއް ގެނުވައިދޭ ނިޒާމަކަށް ހެދުމަށް ސަރުކާރުން ވީ ވައުދުތައް ފުއްދުމަށް މަސައްކަތް ކުރައްވަމުން ގެންދަވާކަން އެމަނިކުފާނު ފާހަގަކުރެއްވިއެވެ.
ސަރުކާރުގެ ތަފާސްހިސާބުތަކަށް ބަލާއިރު، ފާއިތުވި ދެ އަހަރުގެ ތެރޭގައި ހިލޭ ފުރަތަމަ ޑިގްރީއަށް ކިޔަވައިދޭ ސްކީމުގެ ދަށުން 6,000 އަށްވުރެ ގިނަ ދަރިވަރުން ވަނީ ތަޢުލީމު ޙާޞިލުކޮށްފައެވެ. މީގެ އިތުރުން، މި ދެ އަހަރުގެ ތެރޭގައި ޖުމްލަ 1,438 ދަރިވަރުންނަށް މަތީ ތަޢުލީމުގެ ލޯނު ފޯރުކޮށްދީފައިވާއިރު، އޭގެ ތެރެއިން 596 ދަރިވަރުންނަށް ލޯނު ހަމަޖައްސައިދީފައިވަނީ 2025 ވަނަ އަހަރުގެ ތެރޭގައެވެ.
މަތީ ތަޢުލީމާއި ބެހޭ ވުޒާރާގެ މަޢުލޫމާތުތައް ދައްކާގޮތުން، މިދިޔަ އަހަރު އެކަނިވެސް 2,798 ދަރިވަރަކު އަލަށް ފުރަތަމަ ޑިގްރީ ޕްރޮގްރާމްގައި ރަޖިސްޓްރީވެފައިވެއެވެ. އަދި ހިލޭ ޑިގްރީ ޕްރޮގްރާމްގެ ދަށުން މިދިޔަ އަހަރު 3,286 ދަރިވަރުން ވަނީ ދަސްވެނިވެފައެވެ.
ފާއިތުވި ދެ އަހަރުގެ ތެރޭގައި މި ޕްރޮގްރާމަށް އަލަށް ރަޖިސްޓަރީކުރި ދަރިވަރުންގެ ޖުމްލަ އަދަދަކީ 5,863 އެވެ.
ރައީސް އިތުރަށް ވިދާޅުވީ، ދަރިވަރުންނަށް އިންވެސްޓްކޮށް ތަޢުލީމީ ފުރުޞަތުތައް ފުޅާކުރުމަކީ ހަމައެކަނި ވަކިވަކި ފަރުދުންގެ މުސްތަޤްބަލު ބައްޓަންކުރުން ނޫން ކަމަށާއި، އެއީ މުއްސަނދި އަދި ހަމަހަމަކަން ޤާއިމުވެފައިވާ ޤައުމެއް ބިނާކުރުން ކަމަށެވެ.
އުނގެނުމަށް މަސައްކަތްކުރާ ކޮންމެ ކުއްޖަކަށްވެސް ކުރިއަރައިދިއުމުގެ ފުރުޞަތު ހޯދައިދީ، ޤައުމީ ތަރައްޤީގައި ބައިވެރިވުމުގެ މަގު ފަހިކޮށްދެވޭނެ، ކަމުގެ ޔަޤީންކަން ރައީސް ވަނީ ދެއްވާފައެވެ.