ޔޫކްރެއިންގެ އިރުއުތުރު ހަރްކީވް ސަރަހައްދުގައި ފަސަންޖަރުން ގޮވައިގެން ދަތުރުކުރަމުންދިޔަ ރޭލަކަށް ރަޝިޔާއިން ދިން ނުރައްކާތެރި ޑްރޯން ހަމަލާއެއްގައި ފަސް މީހުން މަރުވެ، ގިނަ ބަޔަކު ޒަހަމްވެއްޖެއެވެ.
އިއްޔެ ހިނގި މި ހާދިސާގައި، 200 އަށްވުރެ ގިނަ މީހުންނާއެކު ދަތުރުކުރި އެ ރޭލުގެ އެއް ބަޔަށް ޑްރޯން ހަމަލާއެއް ސީދާ އަމާޒުވިއިރު، އިތުރު ދެ ޑްރޯން ރޭލު ކައިރީގައި ގޮވާފައިވާ ކަމަށް އޮފިޝަލުން މައުލޫމާތު ދެއެވެ.
މި ހަމަލާއަކީ އެއްވެސް އަސްކަރީ ބޭނުމެއް ނެތި އާންމުންނަށް އަމާޒުކޮށްދިން ހަމަލާއެއް ކަމަށާއި، މިއީ ނިރުބަވެރި އަމަލެއް ކަމަށް ބުނެ ޔޫކްރެއިންގެ ރައީސް ވޮލޮޑިމީރް ޒެލެންސްކީ ވަނީ އެކަން ހަރުކަށި އިބާރާތުން ކުށްވެރި ކުރައްވާފައެވެ. ޒެލެންސްކީ ވިދާޅުވި ގޮތުގައި، ހަމަލާ އަމާޒުވި ވަގުތު ރޭލުގެ އެބައިގައި 18 މީހުން ތިއްބެވެ.
މި ހަމަލާއާ ގުޅިގެން ރަޝިޔާއިން މިހާތަނަށް އެއްވެސް ބަހެއް ބުނެފައި ނުވިނަމަވެސް، ރަޝިޔާއިން ވަނީ އެ ގައުމުގެ ހަކަތައާއި ދަތުރުފަތުރުގެ ނިޒާމަށް ދޭ ހަމަލާތައް ވަރަށް ބޮޑަށް ވަރުގަދަކޮށްފައެވެ.
ހަރްކީވްގެ އިތުރުން، ޔޫކްރެއިންގެ ދެކުނު ބަނދަރު ކައިރީގައި އޮންނަ ރަށެއް ކަމަށްވާ އޮޑެސާއަށް ވެސް ރަޝިޔާއިން ވަނީ 50 އަށްވުރެ ގިނަ ޑްރޯން ހަމަލާ ދީފައެވެ. މި ހަމަލާތަކުގައި ތިން މީހުން މަރުވެ، އިމާރާތްތަކަށް ބޮޑެތި ގެއްލުންތަކެއް ލިބިފައިވާ ކަމަށް ރިޕޯޓުތައް ބުނެއެވެ. މީގެ އިތުރުން ކިއޭވް ސަރަހައްދުގެ އާންމުން ދިރިއުޅޭ އިމާރާތަކަށް ދިން ހަމަލާއެއްގައި ދެމަފިރިއަކު މަރުވެ، އެމީހުންގެ ހަތަރު އަހަރުގެ ދަރިފުޅަށް ވަނީ އަނިޔާވެފައެވެ. ރަޝިޔާގެ މި ހަމަލާތަކުގެ ސަބަބުން ޔޫކްރެއިންގެ އެތައް މިލިއަން ބަޔަކު ވަނީ ކަރަންޓާއި، ފެނާއި އަދި ހޫނުކުރާ ނިޒާމުތަކުން މަހުރޫމުވެފައެވެ.
މި ހަމަލާތައް ދީފައި ވަނީ ހަނގުރާމަ ހުއްޓާލުމާ ގުޅޭގޮތުން އެމެރިކާ މެދުވެރިވެގެން ޔޫއޭއީގައި މިދިޔަ ހަފުތާގައި ބޭއްވި މަޝްވަރާތައް ކާމިޔާބު ކަމަށް ބެލެވުނު ނަމަވެސް، ބިމުގެ މިލްކުވެރިކަމާ ގުޅޭ މުހިންމު މައްސަލަތަކެއް ހައްލުނުވެ އޮތް ދަނޑިވަޅެއްގައެވެ.
އަންނަ ހަފުތާ ބަންދުގައި މި މަޝްވަރާތަކުގެ އިތުރު ބައްދަލުވުންތަކެއް ބޭއްވުމަށް ވަނީ ތާވަލުކުރެވިފައެވެ.