މި ރޯދަ މަހުގެ ފަހު 15 ގައި އުމްރާގެ އަޅުކަން އަދާކުރުމަށް ފައިސާ ދެއްކި 110 މީހަކަށް ސައުދީ އަރަބިއްޔާއަށް ނުފުރި، ބޮޑެތި ޝަކުވާތަކެއް ފެންމަތިވެއްޖެއެވެ.
މި މީހުންނަކީ އަލް އަބްރާރު ޓުއާސް އެންޑް ޓްރެވެލްސް ކިޔާ ގްރޫޕަކަށް ފައިސާ ދެއްކި ބައެއް ކަމަށް މީޑިއާ ރިޕޯޓްތައް ބުނެއެވެ.
ފައިސާ ދެއްކި މީހުން ބުނާ ގޮތުގައި، އެންމެ ފަހު ވަގުތު އެ ގްރޫޕުން ދަތުރު ކެންސަލް ކުރީ މެދުއިރުމަތީގެ މަސްލަހަތު އޮތް ގޮތުން ކަމަށް ބުނެއެވެ. ނަމަވެސް، މިކަމާ ގުޅިގެން އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދާ ސުވާލު ކުރުމުން، އުމްރާވެރިން ތިބި ހިސާބަށް އެއްވެސް ނުރައްކަލެއް ނެތް ކަމަށާއި، އިންތިޒާމުތައް ހަމަޖެހިފައިވާ ނަމަ ފުރުވާލުމަށް މިނިސްޓަރު އެންގެވި ކަމަށް އެ މީހުން ބުނެފައިވެއެވެ.
މި މައްސަލައިގެ ތެރެއިން އެނގިފައިވާ ގޮތުގައި، އަލް އަބްރާރު ގްރޫޕުން ރޯދަ މަހު އުމްރާއަށް މީހުން ގެންދިއުމަށް މިނިސްޓްރީގެ ހުއްދައަށް އެދިފައެއް ނުވެއެވެ. އަދި މައްކާއިން ހޮޓާ ވެސް ބުކް ކޮށްފައި ނުވާކަމަށް ފައިސާ ދެއްކި މީހުން ބުނެފައިވެއެވެ.
އެ ގްރޫޕުގެ މެނޭޖިން ޑިރެކްޓަރު ވިދާޅުވީ ހުއްދައަށް އެދި މިނިސްޓްރީއަށް މެއިލް ކުރި ނަމަވެސް، އެ މެއިލް މިނިސްޓްރީއަށް ނުދިޔައީ ކަމަށެވެ.
ފައިސާ ދެއްކި މީހުންނަށް ރިފަންޑް ދޭނެ ކަމަށް ގްރޫޕުން ބުނި ނަމަވެސް، ރިފަންޑް ދެނީ ޓިކެޓަށް ވާ ބައި ކަނޑާފައި ކަމަށް އުމްރާވެރިން ބުނެއެވެ. އަދި ވިސާ ދިން ކަމުގެ ލިޔުން ދިނުމަށް އެދުމުން ވެސް އެކަން ކޮށްދީފައި ނުވާ ކަމަށް އެ މީހުން ތުހުމަތު ކުރެއެވެ. ނަމަވެސް ގްރޫޕުން ބުނަމުންދަނީ ހެޔޮ އެދޭ ފަރާތެއްގެ އެހީގައި ރިފަންޑް ދިނުމުގެ މަސައްކަތް ކުރަމުންދާ ކަމަށެވެ.
މި މައްސަލައާ ގުޅިގެން އިނަ މޯލްޑިވްސްގެ ވެރިޔާ މުހައްމަދު ފިރާގް ވިދާޅުވީ، އެއްވެސް އުމްރާ ގްރޫޕެއްގެ ފައިސާއެއް އެ ކުންފުނިން ހިފަހައްޓާފައި ނުވާނެ ކަމަށެވެ.
”އަޅުގަނޑުމެން މި ގެންދަނީ މި ކުންފުނި މެދުވެރިކޮށް ޓިކެޓު ނެގި ފަރާތްތަކާ ގާތުން ކޯޑިނޭޓްކޮށް، ހުރިހާ އިންތިޒާމުތަކެއް ބަލަހައްޓަމުން،“ފިރާގް ވިދާޅުވިއެވެ.
ފްލައިޓްތައް ކެންސަލްވުމާ ގުޅިގެން ބައެއް ގްރޫޕްތަކުން މިހާރު ވަނީ އަލުން ބުކިންތައް ހަދާފައެވެ. އަދި އުމްރާވެރިން އަނބުރާ ގެނައުމަށް އެހީތެރިވުމުގެ ގޮތުން މޯލްޑިވިއަން އެއާލައިނުން ޖިއްދާއަށް ޗާޓަރު ފްލައިޓެއް ބޭއްވުމަށް ދަނީ ތައްޔާރުވަމުންނެވެ.
މިކަމާ ގުޅޭ އިތުރު ތަފްސީލު އިސްލާމިކް މިނިސްޓްރީ އާއި ހައްޖު ކޯޕަރޭޝަނުން ލިބޭނެ ކަމަށް ވެސް ފިރާގް ވިދާޅުވިއެވެ.