މާލޭގެ ދުވަސްވީ ބަންޑާރަ މިސްކިތަކީ ތާރީހީ ބިނާއެއް ކަމަށާއި އެ މިސްކިތް ތަޅާލައިގެން ނުވާނެ ކަމަށް ކުރީގެ ހެރިޓޭޖް މިނިސްޓަރު ޔުމްނާ މައުމޫން ވިދާޅުވެއްޖެއެވެ.
ޔުމްނާ މިހެން ވިދާޅުވީ ބަންޑާރަ މިސްކިތް ތަޅާލައި އެތަނުގައި އާ މިސްކިތެއް އަޅަން ނިންމާފައިވާކަން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ހާމަކުރެއްވުމާ ގުޅިގެންނެވެ.
އެކަމާ ގުޅިގެން ކަންބޮޑުވުން ފާޅުކުރައްވަމުން ޔުމްނާ ވިދާޅުވީ ބަންޑާރަ މިސްކިތް ތަޅައިލުމަކީ އެއްގޮތަކަށް ވެސް ކޮށްގެންވާނެ ކަމެއް ނޫން ކަމަށެވެ. އެއީ 98 އަހަރުވެފައިވާ މާލޭގެ މުހިންމު ދީނީ، ތާރީޚީ އަދި ސަގާފީ ބިނާއެއްކަން ޔުމްނާ ފާހަގަކުރެއްވި އެވެ.
ޔުމްނާ އިތުރަށް ވިދާޅުވީ، ރާއްޖޭގެ މި ފަދަ ތާރީޚީ ބިނާތަކާއި ސަގާފީ ތަރިކަ ރައްކާތެރިކުރުމަށް ސަގާފީ ތަރިކަ ޤާނޫނެއް ހަދައި ތަސްދީޤު ކުރެވިފައިވާނެ ކަމަށެވެ. މި ގާނޫނުގެ ދަށުން ތާރީޚީ ބިނާތައް ހިމާޔަތްކުރުމުގެ މުހިންމުކަން ޔުމްނާ ފާހަގަކުރެއްވިއެވެ.
އިސްލާމިކް މިނިސްޓަރު ޑރ. ޝަހީމް މިއަދު ވިދާޅުވީ ބަންޑާރަ މިސްކިތް ހުރި ތަނުގައި އާ މިސްކިތެއް އެޅުމަށް ބޭނުންވާ އެހީތެރިކަން ދީލަތި ފަރާތަކުން މިހާރު ހަމަޖެހިފައިވާ ކަމަށެވެ. އަދި އެ މަސައްކަތް މި ރޯދަ މަހަށްފަހު ފަށާނެ ކަމަށް ވެސް މިނިސްޓަރު ވިދާޅުވިއެވެ.
މިނިސްޓަރު ޝަހީމް ވިދާޅުވި ގޮތުގައި މި މަޝްރޫއާއެކު މާލޭގެ ބޮޑެތި ހުރިހާ މިސްކިތްތަކެއް އާވެގެން ދާނެއެވެ.