އެމެރިކާއާއި އިސްރާއީލް ގުޅިގެން އީރާނަށް ދެމުން އަންނަ ވަރުގަދަ ހަމަލާތަކުގައި މިހާތަނަށް މަރުވި މީހުންގެ އަދަދު 1,332 އަށް އަރައިފި ކަމަށް ރިޕޯޓްތައް ބުނެފިއެވެ.
މިދިޔަ މަހުގެ 28 ވަނަ ދުވަހުން ފެށިގެން އެމެރިކާއާއި އިސްރާއީލުން އީރާނަށް ހަމަލާތައް ދޭން ފަށާފައިވާއިރު، މިއަދާ ހަމައަށްވެސް އެއްވެސް ހުއްޓުމެއް ނެތި މި ހަމަލާތައް ދަނީ ކުރިއަށެވެ.
އީރާނުގެ ތަސްނީމް ނިއުސް އޭޖެންސީން ރިޕޯޓުކޮށްފައިވާ ގޮތުގައި، މި ހަމަލާތަކުގައި މަރުވި މީހުންގެ އަދަދު 1,332 އަށް އަރާފައިވީ ނަމަވެސް، އަނިޔާވި މީހުންގެ ސީދާ ތަފްސީލެއް އަދި މިހާތަނަށް ސާފުވެފައެއް ނުވެއެވެ.
މި ހަމަލާތަކުގައި އީރާނުން މަރުވި މީހުންގެ ތެރޭގައި އީރާނުގެ ދެކުނުގެ މިނާބްގައި ހުންނަ އަންހެން ކުދިންގެ ސްކޫލަކަށް އެމެރިކާ އާއި އިސްރާއީލުން ދިން ހަމަލާއެއްގައި މަރުވި 165 ކުދިން ހިމެނެއެވެ.
މި ހަމަލާތަކަށް ރައްދު ދިނުމުގެ ގޮތުން އީރާނުން ވެސް ދަނީ ވަރުގަދަ ހަމަލާތަކެއް ފޮނުވަމުންނެވެ.
އީރާނުން އިސްރާއީލަށް ސީދާ ހަމަލާތަކެއް ފޮނުވާލާފައިވާއިރު މެދުއިރުމަތީގެ ގައުމުތަކުގެ ތެރެއިން އެމެރިކާގެ އަސްކަރީ މަރުކަޒުތައް ގާއިމުކޮށްފައިވާ ގައުމުތަކަށް ވެސް އީރާނުން ވަނީ ހަމަލާ އަމާޒުކޮށްފައެވެ. އީރާނުން ބުނާ ގޮތުގައި އެ ގައުމުތަކުގައި ހުރި އެމެރިކާގެ މަރުކަޒުތަކަށް ދިން ހަމަލާތަކުގައި އެކި ވަރުގެ ގެއްލުންތައް ވަނީ ލިބިފައެވެ.
ޚަބަރުތައް ބުނާގޮތުން އީރާނުން މިހާތަނަށް އެންމެ ގިނަ ހަމަލާތައް ފޮނުވާލާފައިވަނީ ކުވެއިތަށެވެ. މީގެ އިތުރުން ޔުނައިޓެޑް އަރަބް އެމިރޭޓްސް (ޔޫއޭއީ)، އޮމާން އަދި ސައުދީ އަރަބިއްޔާ ފަދަ ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް ވެސް އީރާނުން ވަނީ ހަމަލާދީފައެވެ.