ރާއްޖެއަށް މަސްތުވާތަކެތި އެތެރެކުރާ މީހުންނާއި އޭގެ ވިޔަފާރިކުރާ މީހުންނަށް މަރުގެ އަދަބު ދެވޭ ގޮތަށް މަސްތުވާތަކެއްޗާ ބެހޭ ގާނޫނަށް ގެނައި އިސްލާހަށް އިއްޔެއިން ފެށިގެން އަމަލުކުރަން ފަށައިފިއެވެ.
ސަރުކާރުގެ ފަރާތުން ލ. ގަމު ދާއިރާގެ ޕީއެންސީ މެންބަރު ޔޫސުފް ރަޝީދު މި ބިލު މަޖިލީހަށް ހުށަހެޅުއްވީ 2024 ވަނަ އަހަރުގެ ޑިސެމްބަރު މަހުގައެވެ.
ރައްޔިތުންގެ މަޖިލީހުން މި އިސްލާހު ފާސްކުރީ މިދިޔަ ޑިސެމްބަރު މަހުގެ ތިން ވަނަ ދުވަހުއެވެ. އަދި ރައީސުލްޖުމްހޫރިއްޔާ ޑރ. މުހައްމަދު މުއިއްޒު މި ބިލު ތަސްދީގުކުރެއްވީ އެ މަހުގެ ހަވަނަ ދުވަހުއެވެ.
ގާނޫނުގައިވާ ގޮތުން މި އިސްލާހަށް އަމަލުކުރަން ފަށާނީ ގެޒެޓުގައި ޝާއިއުކުރާ ތާރީހުން ފެށިގެން ތިން މަސްދުވަސް ހަމަވާ ދުވަހުން ފެށިގެންނެވެ.
އަލަށް އަމަލުކުރަން ފެށި އިސްލާހުގައިވާ ގޮތުން، މަސްތުވާތަކެތި އެތެރެކުރުމުގެ ކުށުގައި މަރުގެ އަދަބު ދެވޭނީ ވަކި ޝަރުތުތަކެއް ފުރިހަމަވާ ހާލަތްތަކުގައެވެ. އެގޮތުން:
- އެތެރެކުރި ކެނެބިސްގެ ބަރުދަން 350 ގްރާމަށްވުރެ އިތުރުވުން.
- އެތެރެކުރި ޑައިމޯފިންގެ ބަރުދަން 250 ގްރާމަށްވުރެ އިތުރުވުން.
- ޖަދުވަލު 1 ގައިވާ އެހެން މަސްތުވާއެއްޗެއްނަމަ 100 ގްރާމަށްވުރެ އިތުރުވުން.
މަރުގެ އަދަބު ކަނޑައެޅިއްޖެނަމަ، އެ ހުކުމް ތަންފީޒުކުރެވޭނީ މަތީ މަރުހަލާގެ ކޯޓަކުން މައްސަލަ އަލުން ބެލުމަށް ފަހުއެވެ. އަދި އަދަބު ތަންފީޒުކުރެވޭނީ ދިވެހިރާއްޖޭގެ ސުޕްރީމް ކޯޓުގެ ފަނޑިޔާރުންގެ ބެންޗުގެ އިއްތިފާގުން އެގޮތަށް ހުކުމް ކުރުމުން ކަމަށް ގާނޫނުގައި ބަޔާންކޮށްފައިވެއެވެ.
މީގެ އިތުރުން، އުމުރަށް ޖަލަށްލުމުގެ އަދަބު ނުވަތަ މަރުގެ އަދަބު ކަނޑައަޅާފައިވާ ކުށްތަކަކީ އެއްވެސް ސިފައެއްގައި އަދަބު މައާފުކޮށްދެވޭނެ ނުވަތަ ލުއިކޮށްދެވޭނެ ކުށްތަކެއް ނޫން ކަމަށްވެސް މި އިސްލާހުގައި ވަނީ ކަނޑައަޅާފައެވެ.
މަސްތުވާތަކެތި އެތެރެކުރުމާއި ބޭރުކުރުމުގައި ބައިވެރިވާ ފަރާތްތަކަށް ބޮޑެތި ޖޫރިމަނާތަކެއްވެސް މި ބިލުގައި ކަނޑައަޅާފައިވެއެވެ.
އެގޮތުން 20 އަހަރުގެ ޖަލު ހުކުމަކާއެކު، 75,000 ރުފިޔާއިން ފެށިގެން 7.5 މިލިއަން ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ.