ދުބާއީ އިންޓަނޭޝަނަލް އެއާޕޯޓުގެ އޮޕަރޭޝަންތައް ވަގުތީ ގޮތުން ހުއްޓާލުމަށް ފަހު، މަދު ފްލައިޓްތަކަކާއެކު ދަތުރުތައް އަލުން ފަށައިފިއެވެ.
ފްލައިޓްތަށް އަލުން ފެށި ކަމުގައިވިޔަސް، ފްލައިޓް ޝެޑިއުލްތަކަށް ބަދަލު އަތުވެދާނެތީ، ބުކިން ކޮންފަރމްކޮށްފައި ނޫނީ ދަތުރު ނުކުރުމަށް ކަމާބެހޭ ފަރާތްތަކުން އިލްތިމާސްކޮށްފައިވެއެވެ.
އެއާލައިންތަކުން ރަސްމީ ޗެނަލްތަކުގެ ޒަރީއާއިން އެންމެ ފަހުގެ މައުލޫމާތުތައް ފޯރުކޮށްދެމުންދާތީ، ދަތުރުވެރިން އެކަމަށް ސަމާލުވުމަށް ދުބާއީ އެއާޕޯޓް އޮތޯރިޓީން ވަނީ އެދިފައެވެ.
އެމިރޭޓްސް އެއާލައިނުން ވެސް ވަނީ ދަތުރުތައް މަޑުޖައްސާލުމަށް ފަހު މިހާރު އަލުން އޮޕަރޭޝަންތައް ފަށާފައެވެ. މިއަދު މެންދުރު ފަހުގެ ފްލައިޓްތަކަށް ބުކިން ކަށަވަރުވެފައިވާ ފަސިންޖަރުންނަށް އެއާޕޯޓުން ދަތުރުކުރެވޭނެ ކަމަށް އެ އެއާލައިނުން ބުނެއެވެ. ނަމަވެސް، ދުބާއީ މެދުވެރިކޮށް ޓްރާންސިޓް ކުރާ ފަސިންޖަރުންނަށް ދަތުރު ކުރެވޭނީ އެމީހުންގެ ކަނެކްޓިން ފްލައިޓްތައް ވެސް އޮޕަރޭޓް ކުރާ ނަމަ ކަމަށް އެމިރޭޓްސް އިން ބުނެފައިވެއެވެ.
މެދުއިރުމަތީގެ ގިނަ ގައުމުތަކުގެ ވައިގެ ސަރަހައްދު ބަންދުކުރަން ޖެހުނީ، އީރާނުން އެމެރިކާގެ އަސްކަރީ މަރުކަޒުތަކަށް ދެމުންދާ މިސައިލް އަދި ޑްރޯން ހަމަލާތަކާ ގުޅިގެން ސަލާމަތީ ފިޔަވަޅެއްގެ ގޮތުންނެވެ.
ދުބާއީގެ އިތުރުން ގަތަރުގެ ވައިގެ ސަރަހައްދު ވެސް މިހާރު ވަނީ އަލުން ހުޅުވާލާފައެވެ. ގަތަރުގެ ސިވިލް އޭވިއޭޝަން އޮތޯރިޓީން ބުނެފައިވަނީ، ގަތަރުގެ އަސްކަރިއްޔާއާ ގުޅިގެން ދަތުރުތައް ކުރިއަށް ގެންދާނީ ”ލިމިޓެޑް އޮޕަރޭޝަނަލް ކެޕޭސިޓީ ހުންނަ ނެވިގޭޝަނަލް ކޮންޓިންޖެންސީ ރޫޓުތަކުން“ ނުވަތަ ހާއްސަ ކޮރިޑޯއެއްގެ ތެރެއިން ކަމަށެވެ.
މެދުއިރުމަތީގެ މަސްރަހު ނުތަނަވަސްވެފައިވާ މި ދަނޑިވަޅުގައި، ބައެއް ގައުމުތަކުން މަޑުމަޑުން ވައިގެ ސަރަހައްދުތައް ހުޅުވަމުން ދިޔަ ނަމަވެސް، ދަތުރުވެރިންނަށް އަދިވެސް ވަނީ ސަމާލުވުމަށް އަންގާފައެވެ.