ޢިރާޤުގެ ހުޅަނގުގެ ސަރަޙައްދަކަށް އެމެރިކާގެ އަސްކަރީ ރިފިއުލިންގް އެއާކްރާފްޓެއް (ތެޔޮ އަޅައިދޭ ބޯޓެއް) ބުރާސްފަތި ދުވަހު ވެއްޓިފައިވާކަން އެމެރިކާގެ އަސްކަރިއްޔާއިން ކަށަވަރުކޮށްދީފިއެވެ.
ވެއްޓިފައިވަނީ ކޭސީ–135 ސްޓްރަޓޯޓޭންކަރ މަރުކާގެ ބޯޓެކެވެ. މިއީ އެމެރިކާގެ އެއާފޯސްގައި ވަރަށް ގިނަ ދުވަސްވީ، އެހެން އަސްކަރީ ބޯޓުތަކަށް ވައިގެ ތެރޭގައި ތެޔޮ އެޅުމަށް ބޭނުންކުރާ ބޯޓެކެވެ.
މި ބޯޓުތަކަކީ 1965 ވަނަ އަހަރުން ފެށިގެން ބޭނުންކުރަމުން އަންނަ، ބޮއިންގް 707 މަރުކާގެ ބޯޓުތަކަށް ބިނާކޮށް އުފައްދާފައިވާ ބޯޓުތަކެކެވެ.
މި ހާދިސާ ހިނގާފައިވަނީ އެމެރިކާއަށް ތާއީދުކުރާ ވައިގެ ސަރަޙައްދެއްގައި އޮޕަރޭޝަނެއް ކުރިއަށް ދަނިކޮށެވެ. މިހާރު ސާޗް އެންޑް ރެސްކިއު ޓީމުތަކުން ދަނީ ބޯޓުގެ ފަޅުވެރިންނަށް ވީގޮތެއް ބެލުމުގެ މަސައްކަތް ކުރަމުންނެވެ. އެމެރިކާގެ ސެންޓްރަލް ކޮމާންޑުން މަޢުލޫމާތު ދޭ ގޮތުގައި، މި ބޯޓު ވެއްޓިފައިވަނީ އީރާނާ ދެކޮޅަށް އެމެރިކާއިން ކުރިއަށްގެންދާ ”އޮޕަރޭޝަން އެޕިކް ފިއުރީ“ ގެ ތެރެއިންނެވެ.
މި ހާދިސާގައި ދެ ޓޭންކަރު ބޯޓެއް ބައިވެރިވިއިރު، އޭގެ ތެރެއިން އެއް ބޯޓު ޢިރާޤުގެ ހުޅަނގަށް ވެއްޓުނު ނަމަވެސް، ދެވަނަ ބޯޓު ވަނީ ސަލާމަތްތެރިކަމާއެކު ބިމަށް ޖައްސާފައެވެ.
އަސްކަރީ އޮފިޝަލުން ވިދާޅުވި ގޮތުގައި، މި ބޯޓު ވެއްޓިފައިވަނީ ދެކޮޅުވެރި ބައެއްގެ ހަމަލާއަކުން ނުވަތަ އަމިއްލަ ފަރާތެއްގެ އޮޅުމަކުން ދެވުނު ހަމަލާއަކުން ނޫނެވެ. މީގެ ބަދަލުގައި މިއީ އެކްސިޑެންޓެއް ނުވަތަ އޮޕަރޭޝަނަލް މައްސަލައެއްގެ ސަބަބުން ދިމާވި ކަމެއް ކަމަށް ބެލެވެއެވެ.
ބޯޓު ވެއްޓުނު އިރު އޭގައި މަދުވެގެން ފަސް ފަޅުވެރިން ތިބި ކަމަށް ރިޕޯޓުތައް ބުނި ނަމަވެސް، އެއްވެސް މީހަކު މަރުވިކަން ނުވަތަ އަނިޔާވިކަން އަދި ރަސްމީކޮށް ކަށަވަރުކޮށްދީފައެއް ނުވެއެވެ.
މިއީ މިހާރު އެމެރިކާއާއި އީރާނާ ދެމެދު ހިނގަމުންދާ ކުރިމަތިލުންތަކާ ގުޅިގެން އެމެރިކާއަށް ގެއްލުނު ހަތަރުވަނަ ބޯޓެވެ. މިދިޔަ ހަފްތާގައިވެސް ކުވައިތު މަތިން އޮޅުމަކުން ދެވުނު ހަމަލާއެއްގައި އެމެރިކާގެ ތިން އެފް-15އީ ފައިޓަރު ޖެޓު ވެއްޓިފައިވެއެވެ.