ރިވެލި ބީޗް ރެސްޓޯރަންޓުގެ ބިން އަނބުރާ ނެގުން ހުއްޓުވުމުގެ ވަގުތީ އަމުރެއް ނެރެދޭނެ ސަބަބެއް ނެތް ކަމަށް ސިވިލް ކޯޓުން ސެޕްޓެމްބަރުގައި ނިންމި ނިންމުން ހައިކޯޓުގައި އިސްތިއުނާފުކޮށްފައި އޮއްވައި، ހަމަ އެ އަމުރު 2 ނޮވެމްބަރުގެ ރޭގަނޑު ސިވިލް ކޯޓުން ނެރެފިއެވެ.
އެނގިފައިވާ ގޮތުގައި އެ އަމުރު ނެރުއްވީ މައްސަލަ ބައްލަވާ ގާޒީ ނޫން އެހެން ގާޒީއެއް، އެޗްޑީސީގެ ޣައިރު ހާޒިރުގައެވެ.
ސޮލާރިސް ހޮސްޕިޓާލިޓީ ޕްރައިވެޓް ލިމިޓެޑުން އެޗްޑީސީއާ ދެކޮޅަށް ހުށަހެޅި ނަންބަރު 368-CVCHD-2026 ގަޒިއްޔާ ބައްލަވަނީ ސިވިލް ކޯޓުގެ ގާޒީ ޙަސަން ފަހީމް އިބްރާހީމެވެ. މި މައްސަލަ 22 ސެޕްޓެމްބަރު 2026 ގައި އެ ކޯޓުން ތަފްސީލީ ނިންމުމަކުން ނިންމީ، ސޮލާރިސްއިން ކުލި ނުދައްކައި އެއްބަސްވުމާ ހިލާފުވެފައިވާތީ ވަގުތީ އަމުރެއް ނެރެދޭންޖެހޭ ސަބަބެއް ނެތް ކަމަށެވެ.
އެ ނިންމުން ގޯސް ކަމަށް ބުނެ ސޮލާރިސްއިން ހައިކޯޓަށް ދިޔައެވެ. އެނގިފައިވާ ގޮތުގައި ހައިކޯޓުން މި މައްސަލައާ ގުޅިގެން އަދި ގޮތެއް ނިންމާފައެއް ނުވެއެވެ.
ލިޔެކިޔުންތަކުން އެނގޭ ގޮތުގައި 2 ނޮވެމްބަރުގެ އަމުރުގައި ސޮއިކުރެއްވީ، މައްސަލަ ބައްލަވާ ގާޒީގެ ބަދަލުގައި، B09 ސެކްޝަނުގެ ގާޒީ އަދި ސިވިލް ކޯޓުގެ އިސްގާޒީ މަރްޔަމް ވަހީދެވެ. ކުރިން ނިންމި ނިންމުމާ ދުރަށް ދާންޖެހުނީ ކީއްވެ ކަމެއް، ހައިކޯޓުގައި އޮތް މައްސަލައަކާ ސީދާ ގުޅޭ ނިންމުމެއް ދަށު ކޯޓުން އަލުން ނިންމަންޖެހުނީ ކީއްވެ ކަމެއް، އަދި ބެލީ ކޮން ހެކިތަކަކަށް ކަމެއް އަމުރުގައި ނެތެވެ. ހަމައެކަނި އޮތީ ވަގުތީ އަމުރު ނެރެދޭންޖެހޭ ހާލަތެއް އޮތް ކަމަށް ބުނެފައެވެ.
މައްސަލައިގެ އަސްލަކީ ކުއްޔެވެ. އެޗްޑީސީން ބުނާގޮތުގައި ހުޅުމާލޭ ފޭސް 1 ގެ ރުއްގަނޑު 1 ގައި އޮންނަ ލޮޓް ނަންބަރު 10877 ބިން 1 ޑިސެމްބަރު 2022 ގައި 15 އަހަރަށް ކުއްޔަށް ދިން ފަހުން، 2024 ގެ ޖަނަވަރީން ފެށިގެން ސޮލާރިސްއިން ގަވާއިދުން ކުލި ދައްކާފައެއް ނުވެއެވެ. 11 ފެބްރުއަރީ 2026 ގައި ނޯޓިސް ދިނުމުންވެސް އެއްކޮށް ފައިސާ ދައްކާފައެއް ނުވެއެވެ. 19 މެއި 2026 ގައި އެއްބަސްވުން ބާތިލުކުރިއެވެ.
ސޮލާރިސްއިން ކޯޓަށް ހުށަހެޅި ހިސާބުތަކުން ފެންނަނީ، ރެސްޓޯރަންޓުން 2023 ގައި މަހަކު ގާތްގަނޑަކަށް 1 މިލިއަން، 2024 ގައި މަހަކު 1.5 މިލިއަން ރުފިޔާއަށް ވުރެ ބޮޑު ވިޔަފާރި ކުރި ކަމެވެ. އެއްބަސްވުމުން ލާޒިމުކުރާ އާންމު ފާހާނާބަރި ވެސް ނާޅާ ކަމަށް އެޗްޑީސީން ބުނެއެވެ. ސޮލާރިސްގެ ވާހަކައަކީ ވަގުތީ އަމުރު ނެރެނުދިނީ ގޯސްކޮށް ކަމަށާއި އެ ނިންމުން ބާތިލުކުރަންޖެހޭ ކަމަށެވެ.
ސެޕްޓެމްބަރަށް ފަހު އެޗްޑީސީން ބިން ހުސްކުރަން ދިން ފަހު މުއްދަތު ހަމަވީ 2 ނޮވެމްބަރަށެވެ. އެ ދުވަހު ބިމާ ހަވާލުވެ އެއްބަސްވުން ބާތިލުކޮށްފައިވާކަމުގެ ނޯޓިސް ހިއްޕިއެވެ. އަދި މި މައްސަލައިގެ އަމުރު އައީ އެ ރެއެވެ. އީމެއިލުން އެންމެ ފުރަތަމަ ލިބުނު އަމުރުގައި ކޯޓުގެ ސިއްކަ ނެތް އިރު، ކޯޓުގެ ނަން އޮތީ ”ސިވިލް ހުޅުމާލެ ޑިވިޜަން“ މިހެންނެވެ.
ސިވިލް ކޯޓުގެ މައްސަލަ ވެސް، ހައިކޯޓުގެ އިސްތިއުނާފު ވެސް އޮތީ ނުނިމިއެވެ. އަމުރާ ގުޅޭގޮތުން ސޮލާރިސްގެ ބަހެއް މި ލިޔުން ތައްޔާރުކުރިއިރު ލިބިފައެއް ނުވެއެވެ.