ލަންކާ އަށް އެރި ތޫފާން ”ދިތުވާ“ގެ ސަބަބުން އެގައުމުގެ 1،289 ގެ މުޅިން ހަލާކުވެފައިވާ ކަމަށް ނޭޝަނަލް ހައުސިން ޑިވެލޮޕްމަންޓް އޮތޯރިޓީ (އެންއެޗްޑީއޭ)ގެ އިބްތިދާއީ ތަހުލީލުތަކުން ދައްކައިފިއެވެ.
އެންއެޗްޑީއޭގެ އޮފިޝަލުން މިއަދު ހެނދުނު ލަންކާގެ ރައީސް އޮފީހުގައި ބޭއްވި ބައްދަލުވުމެއްގައި ވަނީ މި ތޫފާނާއި އެއާ ގުޅުން ހުރި އަސަރުތަކުގެ ސަބަބުން ޖުމްލަ ގާތްގަނޑަކަށް 44،500 ގެއަކަށް ގެއްލުން ލިބިފައިވާ ކަމުގެ މައުލޫމާތު ހިއްސާކޮށްފައެވެ.
މި ބައްދަލުވުމުގައި ލަންކާގެ ރައީސް އަނޫރާ ކުމާރާ ދިއްސާނަޔަކޭ އާއި ފިނޭންސް މިނިސްޓްރީގެ އިސް އޮފިޝަލުން ބައިވެރިވެވަޑައިގެންނެވިއެވެ. މި މަޝްވަރާ ބާއްވައިފައިވަނީ ގެތަކަށް ލިބުނު ގެއްލުންތައް މުރާޖައާ ކުރުމަށާއި ބަދަލު ދިނުމުގެ މަސައްކަތް ކުރިއަށްދާގޮތް ވަޒަންކުރުމަށެވެ.
މި ބައްދަލުވުމުގައި ރައީސް ވަނީ މޫސުން ގޯސްވުމުގެ ސަބަބުން ހަލާކުވެފައިވާ ގެތައް ދެނެގަތުމަކީ ރަނގަޅު ހާމަކަން ބޮޑު އުސޫލެއްގެ މަތިން ކުރިއަށް ގެންދިއުމަށް ފިނޭންސް މިނިސްޓްރީއަށާއި އެންއެޗްޑީއޭއަށް އަންގަވާފައެވެ. އަދި ބަދަލު ދިނުމުގެ މަރުހަލާއަށް ކޮންމެހެން ބޭނުންވާ ސައްހަ ޑޭޓާ އެއްކުރުމުގެ ހާއްސަ ނިޒާމެއް ގާއިމް ކުރުމަށް ވެސް ރައީސް ވަނީ އިރުޝާދު ދެއްވާފައެވެ.
ރައީސް އިތުރަށް ފާހަގަކުރެއްވީ، މިފަދަ މުސީބާތްތަކުގެ އަސަރު ތަކުރާރުކޮށް ނުފޯރާ ގޮތަށް، ރިސްކް ބޮޑު އަދި ކާރިސާތައް ގިނަ ސަރަހައްދުތަކުގައި ދިރިއުޅޭ މީހުންނަށް ދިގުމުއްދަތުގެ، ހަމަޖެހޭ ހައްލުތައް ފޯރުކޮށްދިނުމުގެ މުހިންމުކަމެވެ. މި މަސައްކަތްތަކަށް އެހީތެރިވުމަށްޓަކައި އިތުބާރު ހުރި މައުލޫމާތު އެއްކުރުމަށް އިސްކަން ދެއްވުމަށް ވެސް ރައީސް ވަނީ އޮފިޝަލުންނަށް އަންގަވާފައެވެ.
މި ތޫފާނުގެ ސަބަބުން ލިބުނު ގެއްލުންތަކުގައި މަރުވި މީހުންގެ އަދަދު މިހާރު ވަނީ 474 އަށް އަރާފައެވެ.