މޮރޮކޯގެ ތާރީހީ ފެސް ސިޓީގެ ދެ އިމާރާތެއް ވެއްޓި 22 މީހުން މަރުވެ 16 މީހަކަށް އަނިޔާވެފައިވާ ކަމަށް އެ ގައުމުގެ ދައުލަތުގެ ނޫސް އެޖެންސީން ބުނެފިއެވެ.
މި ހާދިސާގައި މަރުވި މީހުންގެ ތެރޭގައި ކުޑަކުދިން ވެސް ހިމެނެއެވެ.
ދައުލަތުގެ އިދާރާތަކުން ހާމަކުރި ގޮތުގައި، މި އިމާރާތްތަކަކީ ފެސް ސިޓީގެ އަލް މުސްތަގްބާލް އަވަށްޓެރި ސަރަހައްދުގައި ހުންނަ ދެ އިމާރާތެވެ. ހަތަރު ބުރީގެ މި ދެ އިމާރާތުގައި ޖުމްލަ އަށް އާއިލާއެއްގެ މީހުން ދިރިއުޅެމުން ދިޔައެވެ.
ރިޕޯޓުތަކުން ބުނިގޮތުގައި، ހާދިސާ ހިނގުމާއެކު ފުލުހުންނާއި ސިވިލް ޕްރޮޓެކްޝަން ސާވިސްތައް ވަގުތުން ހަރަކާތްތެރިވެ، އަނިޔާވި 16 މީހުން ވަނީ ފޭސްގައި ހުންނަ ޔުނިވާސިޓީ ހޮސްޕިޓަލް ސެންޓަރަށް ގެންގޮސް ފަރުވާ ދޭން ފަށާފައެވެ.
މޮރޮކޯގައި މިފަދަ އިމާރާތްތައް ވެއްޓޭ ހާދިސާތައް ދިމާވަނީ މިއީ ފުރަތަމަ ފަހަރަކަށް ނޫނެވެ. މިދިޔަ އަހަރުގެ ފެބްރުއަރީ މަހު ވެސް ފެސްގެ ސިޓީގެ ގެއެއް ވެއްޓި ފަސް މީހަކު މަރުވެފައިވެއެވެ. އަދި މީގެ ގާތްގަނޑަކަށް ދިހަ އަހަރު ކުރިން، 2016 ވަނަ އަހަރު، ހަފްތާއެއްހާ ދުވަހުގެ ތެރޭގައި ދެ އިމާރާތެއް ވެއްޓި، އެ ހާދިސާތަކުގައި ޖުމްލަ ހަ މީހުން މަރުވިއެވެ. އޭގެ ތެރެއިން އެއް އިމާރާތަކީ ހުޅަނގު މާރާކޭޝް ސިޓީގައި ހުރި އިމާރާތެކެވެ.
މިފަދަ ހާދިސާތައް ތަކުރާރުވަމުން އަންނައިރު، މޮރޮކޯގައި ދިރިއުޅުމުގެ ހާލަތު ގޯސްވުމާއި، ފަގީރުކަމާއި، އާންމު ހިދުމަތްތައް އެކަށީގެންވާ މިންވަރަށް ނުލިބުމާ ގުޅިގެން މިދިޔަ ސެޕްޓެމްބަރު މަހު އެ ގައުމުގައި ވަނީ މުޒާހަރާތައް ވެސް ކޮށްފައެވެ.