ސުވިޑެންއަށް ބާރުގަދަ ފިނީގެ ތޫފާނެއްގައި ކުރިމަތިވެ، މިހާތަނަށް ތިން މީހުން މަރުވެފައިވާ ކަމަށް އެގައުމުގެ ކަމާބެހޭ ފަރާތްތަކުން ބުނެފިއެވެ.
ރޭގެ ވަގުތެއްގައި ސުކެންޑިނޭވިއާ ސަރަހައްދަށް އެރި މި ތޫފާނުގެ ސަބަބުން، ހުކުރު ދުވަހާ ހަމައަށް އެތައް ހާސް ބަޔަކަށް ކަރަންޓުގެ ހިދުމަތް މެދުކެނޑި، ބޮޑެތި ގެއްލުންތަކެއް ވަނީ ލިބިފައެވެ.
”ޖޯހަންސް” ގެ ނަމުން ނަންދެވިފައިވާ މި ތޫފާން ބޮޑަށް އަސަރުކޮށްފައިވަނީ ސުވިޑެންގެ އުތުރުގެ ހިސާބުތަކަށާއި ފިންލޭންޑްގެ ހުޅަނގު ސަރަހައްދުތަކަށެވެ.
މި ތޫފާނުގައި މަރުވި ތިން މީހުންނަކީ ވެސް ގަސްތައް ވެއްޓުމުގެ ސަބަބުން ހިނގި ހާދިސާތަކުގައި މަރުވި މީހުންނެވެ.
އެގޮތުން، ސުވިޑެންގެ ހޮފޯސްގައި ވަލުތެރޭގައި މަސައްކަތް ކުރަމުން ދިޔަ އުމުރުން 60 އަހަރުގެ މީހަކު މަރުވެފައިވަނީ އޭނާގެ ގައިމައްޗަށް ގަހެއް ވެއްޓިގެންނެވެ. އަދި ސުވިޑެންގެ މެދުތެރޭގެ ކަންގްސްބާގޭޓް ސްކީ ރިސޯޓް ކައިރީގައި ގަހެއް ވެއްޓި އަނިޔާވި އުމުރުން 50 އަހަރުގެ މީހަކު، ހޮސްޕިޓަލުގައި ފަރުވާ ދެމުންދަނިކޮށް ވަނީ މަރުވެފައެވެ.
މީގެ އިތުރުން، އެގައުމުގެ އުތުރުގެ ރީޖަނަލް ޔުޓިލިޓީ ކުންފުންޏެއް ކަމަށްވާ ހެމާބުގެ މުވައްޒަފަކު ވެސް ވަނީ ތޫފާނާ ގުޅިގެން ހިނގި އެކްސިޑެންޓެއްގައި މަރުވެފައެވެ. ”އެސްވީޓީ“ އިން ރިޕޯޓްކޮށްފައިވާ ގޮތުގައި، މި މުވައްޒަފު ވެސް މަރުވީ މަސައްކަތުގައި އުޅެނިކޮށް ވެއްޓުނު ގަހެއްގެ ދަށުވެގެންނެވެ.
ސުވިޑެންގެ ނޫސް އެޖެންސީ ”ޓީޓީ“ އިން ރިޕޯޓްކޮށްފައިވާ ގޮތުގައި، މި ތޫފާނުގެ ސަބަބުން މަދުވެގެން 40،000 ގެއަކުން ވަނީ ކަރަންޓުގެ ހިދުމަތް ކެނޑިފައެވެ. ގަސްތައް ވެއްޓުމުގެ ސަބަބުން މަގުތައް ބަންދުވެ ޓްރެފިކަށް ބޮޑެތި ބުރޫތަކެއް އަރާފައިވާއިރު، ކަރަންޓުގެ ހިދުމަތް އަލުން އިއާދަކުރުމަށް އެތައް ދުވަހެއް ނަގާނެ ކަމަށް ހިދުމަތް ދޭ ކުންފުނިތަކުން ބުނެއެވެ.