ބަންޑާރަ މިސްކިތާއި ގުޅޭގޮތުން ރައްޔިތުންގެ މަޝްވަރާ ހޯދަން ބޭނުންވާ ކަމަށް އިސްލާމިކް މިނިސްޓަރ ޑރ. މުޙައްމަދު ޝަހީމް އަލީ ސައީދު ވިދާޅުވެއްޖެއެވެ.
މިނިސްޓަރ މިހެން ވިދާޅުވެފައިވަނީ، ބަންޑާރަ މިސްކިތް ތަޅާލުމަށްފަހު އެތަނުގައި އައު މިސްކިތެއް އެޅުމަށް ހަމަޖެހިފައިވާ ކަމަށް އިއުލާން ކުރުމުން އެކަމާ ގުޅޭގޮތުން އާންމުންގެ މެދުގައި ތަފާތު ޝުއޫރުތަކެއް އުފެދިފައިވުމުންނެވެ.
އެގޮތުން ސޯޝަލް މީޑިއާގައި އެތައް ބަޔަކު ވަނީ، މާލޭގައި އެތައް އަހަރެއްވީ ބަންޑާރަ މިސްކިތް ތަޅާނުލުމަށް ގޮވާލައި ކަންބޮޑުވުން ފާޅުކޮށްފައެވެ.
އެކަންބޮޑުވުންތަކާ ގުޅިގެން މިނިސްޓަރ ޝަހީމް ރޭގައި ”އެކްސް“ ގައި ކުރެއްވި ޕޯސްޓެއްގައި ވިދާޅުވީ ބަންޑާރަ މިސްކިތަކީ ރާއްޖޭގެ އާސާރީ ތަރިކައިގެ މިސްކިތްތަކުގެ ތެރޭގައި ހިމަނާފައި އޮންނަ މިސްކިތަކަށް ނުވާތީ، އެތަނުގައި ބޮޑު މިސްކިތެއް ބިނާކުރަން ޤަސްތުކުރެއްވީ ކަމަށެވެ.
”އިސްލާމިކް މިނިސްޓްރީން ކަންކަން ކުރާނީ ރައްޔިތުންގެ އަޑުއަހާފަ. އެއާ އެއްގޮތަށް. އާ މިސްކިތެއް ބިނާކުރުމާމެދު ފުޅާ ދާއިރާއެއްގައި މަޝްވަރާކުރާން ބޭނުން.“ އިސްލާމިކް މިނިސްޓަރު ޝަހީމް ވިދާޅުވެފައިވެއެވެ.
މާލޭ ބަންޑާރަ މިސްކިތާއި، ޒިކުރާ މިސްކިތް ހުރި ބިމުގައި ޒަމާނީ ބޮޑު މިސްކިތެއް އެޅުމަށް ނިންމާފައިވާ ކަމަށް އިއުލާނުކުރީ އިއްޔެއެވެ.