މޫސުމީ ބަދަލުތަކަށް ތަޢުލީމީ ދާއިރާ ހޭނުވުމަށްޓަކައި ”ގްލޯބަލް ޕާޓްނަޝިޕް ފޯ އެޑިއުކޭޝަން“ (ޖީޕީއީ) އިން ދިވެހިރާއްޖެއަށް 200,000 އެމެރިކާ ޑޮލަރުގެ ހިލޭ އެހީއެއް ދިނުމަށް ފާސްކޮށްފިއެވެ.
މި އެހީއަކީ ކްލައިމެޓް ސްމާޓް އެޑިއުކޭޝަން ސިސްޓަމްސް (ސެސީ) ޓެކްނިކަލް އިނިޝިއޭޓިވްގެ ދަށުން ދިނުމަށް ނިންމާފައިވާ އެހީއެކެވެ.
ތަޢުލީމާއި މަތީ ތަޢުލީމާއި ހުނަރުތައް ތަރައްޤީ ކުރުމާބެހޭ ވުޒާރާއިން ވިދާޅުވި ގޮތުގައި، މި އެހީގެ މައިގަނޑު މަޤްޞަދަކީ ރާއްޖޭގެ ތަޢުލީމީ ނިޒާމަކީ މޫސުމީ ބަދަލުތަކަށް ހޭނިފައިވާ އަދި ކާރިސާތަކުން ލިބޭ ގެއްލުންތަކުން އަރައިގަތުމުގެ ޤާބިލުކަން ލިބިފައިވާ ހަރުދަނާ ނިޒާމަކަށް ހެދުމެވެ. ދިވެހި ރުފިޔާއިން ބަލާނަމަ މިއީ ގާތްގަނޑަކަށް 3,084,000 ރުފިޔާގެ އެހީއެކެވެ.
މި މަޝްރޫޢު ރާއްޖޭގައި ކުރިއަށް ގެންދިޔުމަށް ހަމަޖެހިފައިވަނީ ތަޢުލީމީ ވުޒާރާގެ ބެލުމުގެ ދަށުން، ޔުނެސްކޯ އަދި ”ސޭވް ދަ ޗިލްޑްރަން އޮސްޓްރޭލިއާ“ގެ އެއްބާރުލުމާއެކުގައެވެ. ޖީޕީއީއަކީ ތަޢުލީމީ ދާއިރާ ކުރިއެރުވުމަށް ބައިނަލްއަޤްވާމީ ފެންވަރުގައި މަސައްކަތްކުރާ އެންމެ އިސް އެއް ޖަމްޢިއްޔާއެވެ.
މަޝްރޫޢުގެ މައިގަނޑު ދާއިރާތައް
އަންނަ އަހަރުގެ މެއިމަހުގެ ނިޔަލަށް ކުރިއަށް ގެންދާ މި ”ސެސީ“ މަޝްރޫޢުގައި މައިގަނޑު ހަތަރު ދާއިރާއަކުން މަސައްކަތް ކުރުމަށް ވަނީ ރޭވިފައެވެ. އޭގެ ތެރޭގައި:
- މޫސުމާ ގުޅޭ ކަންކަމަށް ޚަރަދު ކުރުމަށް މާލީ އެހީ ހޯދުން
- ޤައުމީ މަންހަޖުގައި މޫސުމާބެހޭ ބައިތައް ހިމެނުން
- މުދައްރިސުން ތަމްރީނު ކުރުން
- ސްކޫލުތަކުގެ ޢުމްރާނީ ވަސީލަތްތައް ވަރުގަދަ ކުރުމާއި މައުލޫމާތު ބަލަހައްޓާ ނިޒާމު ހަރުދަނާ ކުރުން
ޖީޕީއީއަކީ ރާއްޖޭގެ ތަޢުލީމީ ލަނޑުދަނޑިތައް ހާސިލުކުރުމުގައި މުހިންމު ބައިވެރިއެކެވެ. މިހާރުވެސް އެ ޖަމްޢިއްޔާގެ އެހީގައި ”ތަޢުލީމަށް އިންގިލާބީ ބަދަލު“ގެ ނަމުގައި ރާއްޖޭގައި މުހިންމު މަޝްރޫޢެއް ކުރިއަށްދާކަން ފާހަގަކުރެވެއެވެ.