ހއ. އުތީމުގައި އަލަށް ތަރައްޤީކުރި ކުޑަކުދިންގެ ޕާކު ރަސްމީކޮށް ހުޅުވައިފިއެވެ.
”މޫތީ ޕާކު“ ގެ ނަމުން ނަންދީފައިވާ މި ޕާކު ރަސްމީކޮށް ހުޅުވައިދެއްވީ ފަންނާއި ސަގާފަތާއި ތަރިކައާބެހޭ ވުޒާރާގެ ސްޓޭޓް މިނިސްޓަރ އަޙްމަދު މުނާޒުއެވެ.
މި ރަސްމިއްޔާތުގައި ރަށުގެ ގިނަ އަދަދެއްގެ ކުޑަކުދިންނާއި އާންމުން ބައިވެރިވެފައިވެއެވެ.
އުތީމު ކައުންސިލުން ޚަރަދުކޮށްގެން، އެ ރަށު ބޯޅަދަނޑާ އިންވެގެން އޮތް ހުސްބިމުގައި ތަރައްޤީކުރި މި ޕާކަކީ ރަށުގެ ރައްޔިތުންނާއި ކައުންސިލް ގުޅިގެން މަސައްކަތްކޮށްގެން ތަރައްޤީކުރި ތަނެކެވެ. ކައުންސިލުގެ ރައީސް ޢަބްދުﷲ ރަޝީދު މަޢުލޫމާތު ދެއްވި ގޮތުގައި، މިފަދަ ޕާކެއް ހެދުމުގެ މައިގަނޑު ބޭނުމަކީ ރަށުގައި ކުޑަކުދިންގެ ޕާކެއް ނެތުމުގެ ސަބަބުން ކުޑަކުދިންނާއި އާންމުންގެ މެދުގައި އޮތް ކަންބޮޑުވުންތަކަށް ހައްލެއް ހޯދައިދިނުމެވެ.
ޤައުމީ ދުވަހުގެ ހަރަކާތްތަކުގެ ތެރެއިން މި ޕާކު މިހާރު ހުޅުވި ނަމަވެސް، ޕާކު އިތުރަށް ފުރިހަމަކުރުމަށްޓަކައި ގިނަ މަސައްކަތްތަކެއް ކުރިއަށް ގެންދިއުމަށް ވަނީ ރޭވިފައެވެ.
”ފޭސްތަކަކަށް ބަހާލައިގެން އަޅުގަނޑުމެން މި މަސައްކަތް މިގެންދަނީ. މިވަގުތަށް ޕާކު ހުޅުވާލިނަމަވެސް އިތުރު ކަންކަން އަދި އަންނާނެ. ފެންއަރުވާ ވަޑާމަކާއި އިތުރު ވަސީލަތްތައް ޤާއިމުކުރުމުގެ މަސައްކަތް އަދި ކުރިއަށްދާނެ. މިތަން އިތުރަށް ފެހިކުރުމުގެ ވިސްނުންވެސް އެބަހުރި،“ ކައުންސިލުގެ ރައީސް ވިދާޅުވިއެވެ.
މި ޕާކުގައި އެކި އުމުރުފުރާގެ ކުދިންނާ ގުޅޭ ގިނަ ވަސީލަތްތަކެއް ވަނީ ހިމަނާފައެވެ. އޭގެ ތެރޭގައި ސީސޯ، އުނދޯލި އަދި ބޯޅަ ކުޅޭނެ ޚާއްސަ ސަރަޙައްދެއް ހިމެނެއެވެ. މީގެއިތުރުން، ޒިޔާރަތްކުރާ ފަރާތްތަކަށް އިށީނދެ ތިބެވޭނެ ބެންޗުތަކާއި، ހިނގާބިނގާވެ އުޅުމަށް ޚާއްސަ ވޯކްވޭތަކުގެ އިތުރުން ރޭގަނޑު ވަގުތުތަކުގައިވެސް ޕާކު ބޭނުންކުރެވޭނޭހެން ލައިޓިންގ ސިސްޓަމް ވަނީ ޤާއިމުކޮށްފައެވެ.