ފަލަސްޠީނު ރައްޔިތުންގެ ޙައްޤުތައް ހިމާޔަތްކުރުމަށް އިސްލާމީ ޤައުމުތަކުން އެއްބައިވަންތަކަމާއެކު މަސައްކަތްކުރުމަށް ބާއްވާ ޚާއްޞަ ބައްދަލުވުމެއްގައި ބައިވެރިވެވަޑައިގަތުމަށް ދިވެހިރާއްޖޭގެ ޚާރިޖީ ވަޒީރު ޑރ. އަބްދުﷲ ޚަލީލު މިއަދު ސަޢޫދީ އަރަބިއްޔާއަށް ވަނީ ފުރާވަޑައިގެންފައެވެ.
ސަޢޫދީ އަރަބިއްޔާގެ ވެރިރަށް ރިޔާދުގައި ބޭއްވުމަށް ހަމަޖެހިފައިވާ މި ބައްދަލުވުމަކީ އޮގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ގެ ”އެކްސްޓްރާއޯޑިނަރީ ސެޝަން އޮފް ދަ ކައުންސިލް އޮފް ފޮރިން މިނިސްޓަރސް“ ގެ ނަމުގައި ބޭއްވޭ ބައްދަލުވުމެކެވެ. މި ބައްދަލުވުމުގެ އިތުރުން، ޚާރިޖީ ވަޒީރު އެހެނިހެން މުހިންމު ބައްދަލުވުންތަކުގައިވެސް ބައިވެރިވެވަޑައިގަންނަވާނެ ކަމަށް ޚާރިޖީ ވުޒާރާއިން މަޢުލޫމާތު ދެއްވާފައިވެއެވެ.
މި ދަތުރުފުޅުގެ މައިގަނޑު މަޤްޞަދަކީ ފަލަސްޠީނު ރައްޔިތުންގެ ޙައްޤުތައް ރައްކާތެރިކުރުމަށާއި، އިސްރާއީލުން ފަލަސްޠީނުގެ ރައްޔިތުން ފުރުވާލުމަށް ކުރަމުންދާ މަސައްކަތްތަކާ ދެކޮޅަށް އަޑުއުފުލުމަށް އިސްލާމީ ޤައުމުތަކުގެ މެދުގައި މަޝްވަރާކުރުމެވެ. އޯއައިސީއަކީ އިސްލާމީ ޤައުމުތަކަށް ދިމާވާ މައްސަލަތަކުގައި އެކުވެރިކަމާއެކު މަސައްކަތްކުރުމަށް އުފައްދާފައިވާ އެންމެ ބޮޑު ބައިނަލްއަޤްވާމީ ޖަމްޢިއްޔާއެވެ.
ޣައްޒާ އަލުން ބިނާކުރުމަށް މިޞްރުން ހުށަހަޅާފައިވާ ޕްލޭނަށް ދިވެހިރާއްޖެއިން ތާއީދުކޮށްފައިވާކަން ފާހަގަކޮށްލެވެއެވެ. މި ޕްލޭނަކީ ޣައްޒާގެ ކަމާބެހޭ ފަރާތްތަކުގެ ލަފާގެ މަތިން އެކުލަވާލެވިފައިވާ ޕްލޭނެއްކަމަށްވާތީ، ޣައްޒާގެ ރައްޔިތުންނަށް އެމީހުންގެ އަމިއްލަ ވަޒަނުގައި އަމާން ދިރިއުޅުމެއް ބިނާކުރުމަށް އެޅޭ މުހިންމު ފިޔަވަޅެއްގެ ގޮތުގައި ދިވެހިރާއްޖެއިން ދެކެއެވެ.
ރާއްޖެއިން އަބަދުވެސް ވަކާލާތުކުރަމުން އަންނަނީ 1967 ވަނަ އަހަރުގެ ކުރީގެ ފަލަސްޠީނުގެ ސަރަޙައްދުތަކާ އެއްގޮތަށް، އިރުމަތީ ޤުދުސް ވެރިކަން ކުރާ ރަށްކަމުގައި ކަނޑައަޅައި، މިނިވަން ފަލަސްޠީނު ދައުލަތެއް ޤާއިމުކުރުމަށެވެ.