ބްރޯޑްކާސްޓިން ކޮމިޝަނުގެ ނައިބު ރައީސް މުޙައްމަދު ފަޒީން ޖިންސީ ފުރައްސާރަ ކުރިކަމަށް ތުހުމަތު ކުރެވޭ މައްސަލަ ބެލުން އަންނަ ހަފްތާގެ ހޯމަ ދުވަހަށް ލަސްކޮށްފިއެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން މި މައްސަލަ ބަލަމުން ދަނިކޮށް، ފަޒީންގެ ޤާނޫނީ ވަކީލުގެ އަނބިކަނބަލުން ބަލިވުމާ ގުޅިގެން މައްސަލަ ބެލުން ފަސްކުރަން ޖެހުނު ކަމަށް ކޮމިޓީން މަޢުލޫމާތު ދީފައިވެއެވެ.
މި މައްސަލައިގައި ކޮމިޝަނުން ބުނެފައިވާ ގޮތުގައި ފަޒީން އޭނާގެ ހަށިގަނޑުގައި ގަދަކަމުން އަތްލާފައިވާ ކަމަށާއި، އަދި އެހެން އަންހެން މުވައްޒަފަކާ ދިމާލަށް ބޭއަދަބީ ބަހުރުވައިން ވާހަކަދައްކާފައިވާ ކަމަށް ބުނެފައިވާކަން ފާހަގަކުރެވެއެވެ.
މި މައްސަލަ ބްރޯޑްކާސްޓިން ކޮމިޝަނުގެ ޖިންސީ ފުރައްސާރައާއި ގޯނާ ހުއްޓުވުމުގެ ކޮމިޓީއަށް ހުށަހަޅާފައިވާއިރު، ކޮމިޓީގެ ނިންމުމުގައި ބަޔާންކޮށްފައިވަނީ، ”ކޮމިޝަނުގެ ނައިބު ރައީސްގެ މަޤާމުގައި ހުރެ މުވައްޒަފަކާ މެދު މިފަދަ ޢަމަލެއް ހިންގުމަކީ މުޖުތަމަޢުގެ އަޚްލާޤީ މިންގަނޑުތަކާ ޚިލާފު ކަމެއް“ ކަމަށެވެ.
މައްސަލައިގެ ޝިކާރައަކަށްވީ މުވައްޒަފާއި ހަވާލާދީ އޮންލައިން ނޫހަކުން ރިޕޯޓްކޮށްފައިވާ ގޮތުގައި މި ހާދިސާގެ ސަބަބުން އޭނާއަށް ވަނީ ނަފްސާނީ ގޮތުން ވަރަށް ބޮޑަށް އަސަރުކޮށް، ވަޒީފާއަށް ނުކުތުން ހުއްޓާލަން ޖެހިފައެވެ.
މި މައްސަލަ ބެލުމުގައި ކޮމިޓީން މިހާތަނަށް މައްސަލައިގެ ތަފްސީލު ސިއްރުކޮށްފައިވާއިރު، އެފަދައިން އަމަލުކޮށްފައި ވަނީ ދެ ފަރާތެއްގެ އަމިއްލަ މަޞްލަޙަތު ހިމެނޭ މައްސަލައަކަށް މިމައްސަލަ ވާތީ ކަމަށް ކޮމިޓީން ބުނެފައިވެއެވެ.