ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އާއި އެމަނިކުފާނާ ދެމެދު އެއްވެސް މައްސަލައެއް ނެތް ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ޓޫރިޒަމް މިނިސްޓަރުކަމުގައި ހުންނެވި އަބްދުއްރަހީމްގެ ދަރިކަލުން އިބްރާހީމް ފައިސަލް މަގާމުން ވަކިކުރުމާ ގުޅިގެން، ދެ ބޭފުޅުންގެ ދެމެދުގައި ނުތަނަވަސްކަމެއް އުޅޭކަމުގެ ވާހަކަތައް އޭރު ފެތުރިފައިވެއެވެ.
ނަމަވެސް މިއަދު ބޭއްވި ނޫސްވެރިންގެ ބައްދަލުވުމުގައި ރައީސް މުއިއްޒު ވިދާޅުވީ އަބްދުއްރަހީމްއަކީ އޭރުވެސް އަދި މިހާރުވެސް ރަހުމަތްތެރި ދެ މީހުން ކަމަށެވެ.
އިބްރާހީމް ފައިސަލް މަގާމުން ވަކިކުރެއްވި ސަބަބާ ގުޅޭގޮތުން ސުވާލުކުރުމުން ރައީސް މުއިއްޒު ވިދާޅުވެފައިވަނީ އެއީ އެވަގުތަށް ގެންނަން ޖެހިވަޑައިގެންނެވި ބަދަލެއް ކަމަށެވެ. ނަމަވެސް މަގާމުން ވަކިކުރެއްވި ސީދާ ސަބަބެއް ހާމަކުރައްވާފައެއް ނުވެއެވެ.
ކުރިން އަބްދުއްރަހީމް ވަނީ މީޑިއާއަކަށް ދެއްވި އިންޓަވިއުއެއްގައި ރައީސް މުއިއްޒުއާއެކު އޮތް ގުޅުން ގޯސްވެފައިވާކަމަށް ވިދާޅުވެފައެވެ. އަދި އޭގެފަހުން އަބްދުއްރަހީމް މަޖިލީހުގެ ރައީސްކަމުން ދުރުކުރަން މަސައްކަތްކުރާ ކަމުގެ އަޑުތަކެއްވެސް ފެތުރިފައިވެއެވެ.
މިއަދުގެ ނޫސްވެރިންގެ ބައްދަލުވުމުގައި ރައީސް މުއިއްޒު މި ވާހަކަތައް ދޮގުކުރައްވައި، ދެ ބޭފުޅުންގެ ދެމެދުގައި އެއްވެސް މައްސަލައެއް ނެތްކަން ވަނީ ކަށަވަރުކޮށްދެއްވާފައެވެ.