ޔަހޫދީ އިޒްރޭލުގެ އަނިޔާވެރިކަން މިހާރު ވަނީ ހައްދުން ނައްޓާފައި ކަމަށާއި އެ ޤައުމުން ދަނީ ނުޅި ސަރަހައްދުގެ ހަމަޖެހުމާއި ސުލްހަ ނަގާލަމުން ކަމުގައި ފޮރިން މިނިސްޓަރ ޑރ. ޢަބްދުﷲ ޚަލީލް މިރޭ ވިދާޅުވެއްޖެއެވެ.
މިނިސްޓަރ ޚަލީލް މިހެން ވިދާޅުވީ އޮގަނައިޒޭޝަން ފޮ އިސްލާމިކް ކޯޕަރޭޝަންގެ 51 ވަނަ ކައުންސިލުގައި ވާހަކަ ދައްކަވަމުންނެވެ.
އެ ކައުންސިލު ބައްދަލުވުމުގައި މިނިސްޓަރު ވަނީ އުއްމަތަށް ކުރިމަތިވެފައިވާ ގޮންޖެހުންތަކާއި ހާއްސަކޮށް ފަލަސްތީނުގެ ރައްޔިތުންނަށް ދިމާވެފައިވާ ދަތިތަކަށް ހައްލެއް ހޯދައިދޭން ގުޅިގެން މަސައްކަތްކުރުމަށް ގޮވާލައްވައިފައެވެ.
އެގޮތުން މިނިސްޓަރ ޚަލީލް ވިދާޅުވީ އިޒްރޭލުގެ އަނިޔާވެރިކަން ހައްދެއް ނެތް ކަމަށާއި ފަލަސްތީނުގެ ރައްޔިތުންނާ ދެކޮޅަށްދޭ އަނިޔާތަކުން ފެށިގެން އިރާނަށް ދިން ހަމަލާތަކުން ވެސް އެ ގައުމަކީ މުޅި ސަރަހައްދުގެ ހަމަޖެހުމަށް އޮތް ބޮަޑު ނުރައްކަލެއްކަން ދޭހަވާ ކަމަށެވެ.
ރާއްޖެއިން އަބަދުވެސް ދެމި އޮންނާނީ ފަލަސްތީނުގެ ހައްގުގައި ވަކާލާތު ކުރުމުގައިކަން ފާހަގަ ކުރައްވަމުން ފޮރިން މިނިސްޓަރ އިތުރަށް ވިދާޅުވީ ފަލަސްތީނަކީ މިނިވަން އަދި އިސްތިގްލާލީ ގައުމެއްގެ ގޮތުގައި ބަލައިގަތުމަކީ ސުލްހައާއި އިންސާފު ގާއިމްކުރުމަށް ވަރަށް މުހިންމު ކަމެއް ކަމަށެވެ.