މ. މުލަކު މަގުތައް ޒަމާނީ ފެންވަރަށް ތަރައްގީކުރުމުގެ މަޝްރޫއު ތެރެއިން ކުރާ މަސައްކަތްތައް، ރޯޑް ޑެވެލޮޕްމަންޓް ކޯޕަރޭޝަން (އާރްޑީސީ) އިން ހަލުވިކަމާއެކު ދަނީ ކުރަމުންނެވެ.
މިގޮތުން، މިވަގުތު ކުރިއަށްދަނީ އަމީނީ މަގުގައި ދުވާރުގެ މަސައްކަތްތަކުގެ ތެރެއިން ކޯނަރ ކާރބްލައިންގައި ކާރބް ސްޓޯން ޖެހުމުގެ މަސައްކަތްކަމަށް މިރޭ އާރްޑީސީން އެކްސްގައި ކުރި ޕޯސްޓެއްގައި ބުންޏެވެ.
މުލަކުގެ ފިޓްނަސް ސެންޓަރާއި މަގު ހެދުމުގެ މަޝްރޫއުގެ މަސައްކަތް ކުރިއަށް އޮތް 4 މަސް ތެރޭ ނިންމަވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ މިއަހަރުގެ ސެޕްޓެމްބަރު މަހުގެ 21 ވަނަ ދުވަހު އެރަށަށް ވަޑައިގެން ވިދާޅުވެފައެވެ.
ރައީސް ވިދާޅުވި ގޮތުގައި މުލަކުގެ މަގުތަކުގެ މަސައްކަތް މިހާރު ވަނީ ތާރު އެޅުމުގެ މަރުހަލާއާ ހަމައަށް ގޮސްފައެވެ. އަދި އާރްޑީސީން މި މަސައްކަތް ނިންމުމަށް ތައްޔާރުވަމުންދާ ކަމަށާއި، އެ ދުވަހުން ފެށިގެން 4 މަސް ދުވަހުގެ ތެރޭގައި މަގު ހެދުމުގެ މަޝްރޫއު ނިންމާލެވޭނެ ކަމަށް އެމަނިކުފާނު ވިދާޅުވިއެވެ.
މުލަކުގެ މަގުތައް ޒަމާނީ ފެންވަރަށް ތަރައްޤީކުރުމުގެ މަސައްކަތް ސަރުކާރުން އާރްޑީސީ އާ ހަވާލުކޮށްފައި ވަނީ 2021 ވަނަ އަހަރުއެވެ.