މަސްވެރިންގެ ޤައުމީ ދަފްތަރުގައި ރަޖިސްޓްރީވެފައިވާ 89 މަސްވެރިއަކަށް ބޭންކް އޮފް މޯލްޑިވްސް (ބީއެމްއެލް) އިން ލޯނު ދޫކޮށްފައިވާ ކަމަށް ފިޝަރީޒް މިނިސްޓްރީން ބުނެފިއެވެ.
މީ މިދިޔަ އަހަރުގެ މެއި މަހުގެ ފުރަތަމަ ދުވަހުން ފެށިގެން ދަފްތަރުގައި ރަޖިސްޓްރީވެފައިވާ މަސްވެރިންނަށް ދޫކޮށްފައިވާ ލޯނުތަކެކެވެ.
މަސްވެރިންނަކީ ދައުލަތް ދަންނަ ބަޔަކަށް ހެދުމަކީ މި ސަރުކާރުން ވަރަށް ބޮޑު އިސްކަމެއް ދީގެން ކުރަމުންދާ މަސައްކަތެކެވެ. މިގޮތުން މަސްވެރިންގެ ޤައުމީ ދަފްތަރެއް އެކުލަވާލުމުގެ އެންމެ މުހިންމު އެއް ބޭނުމަކީ، އެހެން ވަޒީފާތަކުގައި އުޅޭ މީހުންނެކޭ އެއްފަދައިން މަސްވެރިންނަށްވެސް ފަސޭހައިން ލޯނާއި އެނޫންވެސް މާލީ ޚިދުމަތްތައް ލިބޭނެ މަގު ފަހިކޮށްދިނުމެވެ.
މަސްވެރިންނަށް ފަސޭހަކަމާއެކު ފައިނޭންސް ލިބޭނެ މަގު ތަނަވަސްކޮށްދިނުމަށް ބީއެމްއެލްއާއި ފިޝަރީޒް މިނިސްޓްރީއާ ދެމެދު އެއްބަސްވުމެއްގައި ސޮއިކޮށްފައިވަނީ 28 އެޕްރީލް 2024 ގައެވެ. މި އެއްބަސްވުމުގެ ދަށުން ލޯނު ދޫކުރަމުން ދަނީ ”ބީއެމްއެލް މަސްވެރިޔާ ޕޯޓަލް“ މެދުވެރިކޮށެވެ.
މި ޕޯޓަލް މެދުވެރިކޮށް ގެދޮރު ގަތުމާއި، އިމާރާތް ކުރުމާއި، މަތީ ތަޢުލީމް ޙާސިލް ކުރުމުގެ އިތުރުން އުޅަނދު ބަނުމާއި މަރާމާތު ކުރުމަށްވެސް ލޯނަށް އެދެވޭނެއެވެ. އަދި ގެސްޓްހައުސް ވިޔަފާރިއަށް އިންވެސްޓް ކުރުމާއި ލުއި ފައިނޭންސިންގއަށް އެދުމުގެ ފުރުޞަތުވެސް މަސްވެރިންނަށް ވަނީ ހުޅުވާލެވިފައެވެ.
ޚާއްޞަ އިނާޔަތެއްގެ ގޮތުން، ޝަރުތު ހަމަވާ މަސްވެރިންނަށް ރަހުނަކާ ނުލައި އަދި އަމިއްލަ އިކުއިޓީއަކާ ނުލައި 300,000 ރުފިޔާއާ ހަމައަށް ޕަރސަނަލް ފައިނޭންސިންގ ދޫކުރެއެވެ.
މީގެއިތުރުން، މަސްވެރިކަމުގެ މޫސުމަށް އަންނަ ބަދަލުތަކަށް ރިއާޔަތްކޮށް، ފައިސާ އަނބުރާ ދެއްކުމުގައި ލުއި ގޮތްތަކެއް ބޭންކުން ވަނީ ހަމަޖައްސައިދީފައެވެ.