އުރީދޫ މޯލްޑިވްސްގެ މިދިޔަ އަހަރުގެ ފައިދާއިން ހިއްސާއަކަށް 3.53 ރުފިޔާ ބެހުމަށް ނިންމައިފިއެވެ.
މި ގޮތަށް ނިންމާފައިވަނީ ބުދަ ދުވަހުގެ ރޭ އުރީދޫގެ ހެޑް އޮފީހުގައި ބޭއްވި އެ ކުންފުނީގެ އަހަރީ އާންމު ޖަލްސާގައެވެ.
މި ޖަލްސާގައި އުރީދޫގެ 353 ހިއްސާދާރުން ބައިވެރިވެފައިވާއިރު، އޭގެ ތެރޭގައި ޖަލްސާއަށް ހާޒިރުވި 144 ހިއްސާދާރުންނާއި 209 ހިއްސާދާރުން ތަމްސީލުކުރި 27 ޕްރޮކްސީން ހިމެނެއެވެ. މިއީ އެ ކުންފުނީގެ ޖުމުލަ ހިއްސާގެ 98 އިންސައްތަ ކަމަށް އުރީދޫން ބުނެފައިވެއެވެ.
މިއަހަރުގެ ޖަލްސާ ބާއްވާފައިވަނީ ކުންފުނީގެ އޮފީހަށް ހާޒިރުވެގެންނާއި މޯލްޑިވްސް ސެކިއުރިޓީޒް ޑިޕޮސިޓަރީގެ ’ފަހިވޯޓް‘ މެދުވެރިކޮށް އޮންލައިންކޮށެވެ.
ހިއްސާގެ ފައިދާ ބެހުމުގެ އިތުރުން، މި ޖަލްސާގައި ވަނީ މިދިޔަ އަހަރުގެ މާރިޗު 9 ވަނަ ދުވަހު ބޭއްވި އަހަރީ އާންމު ޖަލްސާގެ ޔައުމިއްޔާ އާއި، 2023 ވަނަ އަހަރުގެ އޮޑިޓް ކޮށްފައިވާ މާލީ ބަޔާންތަކާއި ޑިރެކްޓަރުންގެ ރިޕޯޓު ފާސްކޮށްފައެވެ. އަދި ކުރިއަށް އޮތް އަހަރަށް ކުންފުނީގެ އޮޑިޓަރުގެ ގޮތުގައި ކޭޕީއެމްޖީ އައްޔަންކުރުމަށްވެސް ވަނީ ނިންމާފައެވެ.
މިޖަލްސާގައި ވަނީ އުރީދޫ މޯލްޑިވްސްގެ ބޯޑަށް ޑިރެކްޓަރުންގެ ގޮތުގައި ކުންފުނީގެ މެޖޯރިޓީ ހިއްސާދާރު، ވަތަނިއްޔާ އިންޓަރނޭޝަނަލް ތަމްސީލުކުރުމަށް ފާތިމަތު ސުލްޠާން އަލް-ކުވާރީ އަލުން އައްޔަންކޮށްފައެވެ. އަދި އާންމު ހިއްސާދާރުންގެ ފަރާތުން ބޯޑުގައި އިންނަވާނެ ޑިރެކްޓަރަކަށް އަބްދުﷲ އަލީ އައްޔަންކޮށްފައިވެއެވެ.
އުރީދޫން ބުނެފައިވަނީ އެ ކުންފުނިން އަބަދުވެސް މަސައްކަތް ކުރަމުންދަނީ އަހަރުން އަހަރަށް ކުންފުނީގެ އާމްދަނީ އިތުރުކޮށް، ފައިދާ ބޮޑުކުރުމަށެވެ. އަދި އާންމު ރައްޔިތުންނަށް ފައިދާކުރަނިވި ގިނަ މަސައްކަތްތަކެއް ކުރިއަށް އޮތް ތަނުގައިވެސް ކުރިއަށް ގެންދާނެ ކަމުގެ ޔަގީންކަން އެ ކުންފުނިން ވަނީ ދީފައެވެ.