ފަހި ދިރިއުޅުން ކޯޕަރޭޝަން (އެފްޑީސީ)ގެ ފްލެޓްތައް ކުއްޔަށް ދޭނަމަ، އެ ފަރާތްތައް ބައިލައްކަ ރުފިޔާއާ ހަމައަށް ޖޫރިމަނާކޮށް ފްލެޓްތައް އަތުލާނެކަމަށް އެފްޑީސީއިން ބުނެފިއެވެ.
އެފްޑީސީން ހުޅުމާލެ ދެވަނަ ފިޔަވަހީގައި ތަރައްގީކޮށްފައިވާ 4000 ފްލެޓަކީ ދެ ކޮޓަރި އަދި ތިން ކޮޓަރީގެ އެޕާޓްމެންޓްތަކެކެވެ.
ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ދޫކުރާ މިފަދަ އެއްވެސް ތަނެއް ކުއްޔަށް ދީގެން މަންފާ ހޯދުމަކީ އެއްބަސްވުމާ ހިލާފު ކަމެކެވެ. ނަމަވެސް، ދާދި ފަހުން ސޯޝަލް މީޑިއާގައި ވަނީ ތިން ކޮޓަރީގެ އެޕާޓްމެންޓެއް 23،000 ރުފިޔާއަށް ކުއްޔަށް ދިނުމަށް އިޝްތިހާރުކޮށްފައެވެ. މިއީ ސަރުކާރުން އެ ތަނަށް ކަނޑައަޅާފައިވާ 11،500 ރުފިޔާގެ ކުއްޔަށް ވުރެ ދެގުނަ ބޮޑު އަދަދެކެވެ.
މި މައްސަލައާ ގުޅިގެން އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް ވިދާޅުވީ، އެފްޑީސީގެ ފްލެޓްތަކަކީ ތިންވަނަ ފަރާތަކަށް ކުއްޔަށް ދެވޭނެ ތަންތަން ނޫން ކަމަށެވެ.
”މިފަދަ އަމަލުތައް ކުރާ ފަރާތްތައް 50،000 ރުފިޔާއާ ހަމައަށް ޖޫރިމަނާކޮށް ފްލެޓުގެ އެއްބަސްވުން އުވާލެވޭނެ،“ ހަމްދާން ވިދާޅުވިއެވެ.
ހަމްދާން އިތުރަށް ފާހަގަކުރެއްވި ގޮތުގައި، އިޖުތިމާއީ ބޯހިޔާވަހިކަމަށް ދޫކޮށްފައިވާ ތަންތަން ބޮޑު އަގުގައި ކުއްޔަށް ދިނުމަކީ ސަރުކާރުން ރައްޔިތުންނަށް މި ހައްގު ކަށަވަރުކޮށްދިނުމަށް ކުރާ މަސައްކަތަށް ހުރަސްއެޅޭ ކަމެކެވެ.
އަދި ފްލެޓްތައް ބޭނުންކޮށްގެން ނަހަމަ ފައިދާ ހޯދާ ވިޔަފާރިއަކަށް ހެދުމަކީ ކޮންމެ ދިވެއްސެއްގެ ހައްގަށް އަރައިގަތުން ކަމަށްވެސް ހަމްދާން ސިފަކުރެއްވިއެވެ.