ރާއްޖޭގެ ތިމާވެށި ހިމާޔަތްކުރުމުގެ އެކި މަސައްކަތްތަކަށް ފައިސާ ހޯދުމަށް ފަތުރުވެރިންގެ އަތުން ނަގަމުންދާ ގްރީން ޓެކްސްގެ ގޮތުގައި މިއަހަރުގެ މިހާތަނަށް ދައުލަތަށް 410 މިލިއަން ރުފިޔާ ލިބިފައިވާ ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފިއެވެ.
ފިނޭންސް މިނިސްޓްރީން އާންމުކޮށްފައިވާ ރިޕޯޓުތަކުގައިވާ ގޮތުން، މިއީ މިދިޔަ މަހުގެ 26 ވަނަ ދުވަހުގެ ނިޔަލަށް ދައުލަތަށް ލިބިފައިވާ އާމްދަނީއެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު ވަރަށް ބޮޑު ކުރިއެރުމެކެވެ.
ތަފާސްހިސާބުތަކަށް ބަލާއިރު، މިދިޔަ އަހަރުގެ މި މުއްދަތުގައި ގްރީން ޓެކްސްގެ ގޮތުގައި ލިބިފައިވަނީ 222 މިލިއަން ރުފިޔާއެވެ. އެހެންކަމުން މިއަހަރު ލިބުނު އާމްދަނީ ވަނީ ކުރީ އަހަރަށްވުރެ 188 މިލިއަން ރުފިޔާ އިތުރުވެފައެވެ. މިއީ ގާތްގަނޑަކަށް 84 އިންސައްތައިގެ ބޮޑު އިތުރުވުމެއްކަން ފާހަގަކުރެވެއެވެ.
އޮކްޓޯބަރު 2016 އިން ފެށިގެން ނަގަން ފެށި ގްރީން ޓެކްސްއަކީ ރާއްޖޭގެ ރިޒޯޓުތަކާއި، ހޮޓާތަކާއި، ގެސްޓްހައުސްތަކުގެ އިތުރުން ސަފާރީތަކުގައި މަޑުކުރާ ފަތުރުވެރިންގެ އަތުން ނަގާ ޓެކްސްއެކެވެ. މިހާރު އަމަލުކުރަމުންދާ ގަވާއިދުގެ ދަށުން، ރިޒޯޓުތަކާއި 50 ކޮޓަރިއަށްވުރެ ގިނަ ހޮޓާތަކުން ދުވާލަކަށް 12 ޑޮލަރު ނަގާއިރު، 50 ކޮޓަރިއަށްވުރެ މަދު ގެސްޓްހައުސްތަކުން ނަގަނީ 6 ޑޮލަރެވެ.
ގްރީން ޓެކްސްގެ ގޮތުގައި ލިބޭ ފައިސާ ޖަމާކުރެވެނީ ޚާއްސަ ”ގްރީން ފަންޑް“ އަށެވެ. މި ފަންޑުގެ ބޭނުމަކީ ރަށްރަށުގެ ކުނި މެނޭޖްކުރުމާއި، ފެނާއި ނަރުދަމާގެ ނިޒާމުތައް ގާއިމުކުރުމުގެ އިތުރުން، ރާއްޖޭގެ ނާޒުކު ތިމާވެށި ހިމާޔަތްކުރުމަށް ހިންގާ އެކި މަޝްރޫއުތަކަށް މާލީ އެހީތެރިކަން ފޯރުކޮށްދިނުމެވެ.