ފުލުހުން އާންމުކޮށްފައިވާ އެންމެ ފަހުގެ ތަފާސްހިސާބުތަކުން ދައްކާ ގޮތުގައި، މިދިޔަ މާރިޗު މަހުގެ 22ވަނަ ދުވަހުން ފެށިގެން ހަތް ދުވަހުގެ މުއްދަތުގައި، މާލެ އާއި ސިނަމާލެ ބްރިޖުގެ އިތުރުން ހައިވޭގައި ޖުމްލަ 56 އެކްސިޑެންޓު ހިނގައިގެން ރިޕޯޓުކޮށްފައިވެއެވެ.
މި ހާދިސާތަކުގެ ތެރެއިން އެންމެ ގިނަ އެކްސިޑެންޓުތައް ރިކޯޑުކުރެވިފައި ވަނީ މާލޭގެ މަގުތަކުގައެވެ.
އެގޮތުން، ރިޕޯޓުކުރެވުނު 56 މައްސަލައިގެ ތެރެއިން 49 ހާދިސާއެއް ހިނގާފައި ވަނީ ސީދާ މާލެ ތެރޭގައެވެ. ފުލުހުންގެ އިދާރާއިން މައުލޫމާތު ދީފައިވާ ގޮތުގައި، މި މުއްދަތުގައި އެންމެ ގިނައިން އެކްސިޑެންޓުވެފައި ވަނީ މާރިޗު 25ވަނަ ދުވަހުއެވެ. ހަމައެކަނި އެ ދުވަހު ވެސް 13 އެކްސިޑެންޓެއް ރިޕޯޓުކޮށްފައިވެއެވެ.
ހިނގާފައިވާ އެކްސިޑެންޓުތަކުގެ ބާވަތަށް ބަލާއިރު، ދެ ސައިކަލު މުޑިއަރައިގެން 14 ހާދިސާއެއް އަދި ކާރަކާއި ސައިކަލެއް ޖެހިގެން 14 ހާދިސާއެއް ހިނގާފައިވެއެވެ.
މީގެ އިތުރުން، އެކްސިޑެންޓުވުމަށްފަހު ފިލައިގެން ދިޔަ ހަތް މައްސަލައެއް ވެސް ފުލުހުންނަށް ވަނީ ހުށަހެޅިފައެވެ.