އައްޑޫ ސިޓީގައި މިދިޔަ ހަފުތާގައި ހިނގި އެކްސިޑެންޓުގައި އަނިޔާވި ފިރިހެން މީހާ އިއްޔެ ނިޔާވުމާ ގުޅިގެން، އެ ހާދިސާއާ ގުޅޭ ޖިނާއީ ބޮޑު ތަހުގީގެއް ފުލުހުން ފަށައިފިއެވެ.
މިދިޔަ ހަފުތާގެ އާދީއްތަ ދުވަހުގެ ރޭ އައްޑޫ ހިތަދޫގެ ބޮޑު މަގުގައި ދެ ސައިކަލެއް ޖެހިގެން ހިނގި އެ އެކްސިޑެންޓުގައި ނިޔާވީ ހިތަދުއަށް އުފަން އުމުރުން 48 އަހަރުގެ ރަމީޒް ޢަބްދުالله އެވެ. ރަމީޒްގެ އަންހެނުން ބުދަ ދުވަހު ’ފޭސްބުކް’ގައި ހިއްސާކުރި ޕޯސްޓެއްގައި ބުނެފައިވަނީ އެކްސިޑެންޓަށް ފަހު ރަމީޒްގެ ސިކުނޑީގެ އޮޕަރޭޝަނެއް ކުރި ކަމަށެވެ.
އެކަމަކު، ރަމީޒް ނިޔާވީ ސިކުނޑީގެ އެތެރެއަށް ލޭ އެޅި، އަދި ބައެއް އެހެނިހެން ސީރިއަސް އަނިޔާތައް ލިބިގެން ކަމަށް އެ ޕޯސްޓުގައިވެއެވެ. އަދި، ބޮލުގެ ކަށިގަނޑަށް ވެސް ބައެއް އަނިޔާތައް ލިބުނު ކަމަށް ރަމީޒްގެ އަންހެނުން ލިޔެފައިވެއެވެ.
ފުލުހުން ބުނީ، ރަމީޒް ނިޔާވީ އޭނާއަށް ލިބުނު އަނިޔާތަކަށް އޭޑީކޭ ހޮސްޕިޓަލުގައި ފަރުވާދެމުންދަނިކޮށް ރޭގެ ވަގުތެއްގައި ކަމަށެވެ. އަދި އެ އެކްސިޑެންޓުގައި ހިމެނޭ ދެވަނަ ސައިކަލު ދުއްވި މީހާއަށް އައްޑޫ އިކުއިޓޯރިއަލް ހޮސްޕިޓަލުގައި ފަރުވާ ދެމުންދާ ކަމަށް ވެސް ފުލުހުން ބުންޏެވެ.
ދެވަނަ ސައިކަލު ދުއްވި މީހާގެ ލައިސަންސް އެބައޮތް ކަމަށާއި މި މައްސަލަ ޖިނާއީ ބޮޑު މައްސަލައެއްގެ ގޮތުގައި ބަލަމުން އަންނަ ކަމަށް ފުލުހުން ބުނެފައިވެއެވެ.
މި އެކްސިޑެންޓުގެ އިތުރުން، މިދިޔަ އާދީއްތަ ދުވަހުގެރޭ ކަފިހިހުރަހުން ހުރަސްކުރި ދިވެހި ފިރިހެނެއްގެ ގައިގައި ސައިކަލަކުން ޖެހި ވަނީ އަނިޔާވެފައެވެ.