މިފަހަރުގެ ވޯލްޑް ކަޕްގައި ޖަޕާނާއި ބްރެޒިލް ރޭގައި ވާދަކުރި ފޯރިގަދަ މެޗު، 2-1 އިން ބްރެޒިލް ކާމިޔާބު ކޮށްފިއެވެ. ދެ ޓީމުގެ މެދުގައި ސްކޯ އެއްވަރުވެފައި ވަނިކޮށް، ބްރެޒިލް މޮޅުވީ މެޗު ނިމިގެން ކުޅުނު އިތުރު ވަގުތުގައި ގެބްރީލް މާޓިނެއްލީ ޖަހައިދިން ލަނޑަކުންނެވެ.
މިއާއެކު ވޯލްޑް ކަޕެއްގައި ތިންވަނަ ބުރަށް ދިޔުމަށް ޖަޕާން ކުރި އުއްމީދު މިވަނީ މިފަހަރުވެސް ފެނަށް ގޮސްފައެވެ. ޖަޕާނަށް ވޯލްޑް ކަޕްގައި މިހާތަނަށް އެންމެ ދުރަށް ވެސް ދެވިފައިވަނީ ދެވަނަ ބުރަށް ނުވަތަ ނޮކްއައުޓް ބުރަށެވެ.
އެމެރިކާގެ ހިއުސްޓަން ސްޓޭޑިއަމްގައި ކުޅުނު އެ މެޗުން ޖަޕާން ބަލިވި ކަމުގައިވިޔަސް، އެއީ އާދައިގެ ދެރަ ޓީމެއްކަމަށް ބުނެވޭކަށް ނެތެވެ. އެގޮތުން ބްރެޒިލް ދިފާއު ފޫއަޅުވާލައި، މެޗުގެ 29 ވަނަ މިނިޓްގައި ކައިޝޫ ސާނޯ ތިރިން ކަނަށް ފޮނުވާލީ ވަރަށް ރީތި ގޯލެއްކަމުގައި ގިނަ ބަޔަކު ޤަބޫލު ކުރެއެވެ.
އެއަށްފަހު ބްރެޒިލް ވެސް ޕްރެޝަރަށް ވެއްޓި، ކުޅުން ވަރުގަދަ ކުރިއެވެ. އެގޮތުން މެޗުގެ 68.6 އިންސައްތަ ވަގުތަށް ބޯޅަ ގެންގުޅުނީ ބްރެޒިލް އެވެ. އަދި ޖަޕާނާ ދެކޮޅަށް 12 ހަމަލާ އުފެއްދިއިރު، ޖަޕާންގެ ގޯލަށް 7 ހަމަލާ އަމާޒުވެސް ކުރިއެވެ.
ބްރެޒިލްގެ މި އުފެއްދުންތެރި ކުޅުމަށް ޖަޕާނުން ދިން ރައްދަކީ، ފަސް ހަމަލާ ފޮނުވާލުމާއި އޭގެ ތެރެއިން ގޯލަށް އެންމެ ދެ ހަމަލާ އަމާޒުކުރުމެވެ.
ބްރެޒިލްއަށް މެޗު އެއްވަރުކޮށްދިނީ 56 ވަނަ މިނިޓްގައި ގޯލު ކުރިމައްޗަށް ދިފާއީ ކުޅުންތެރިޔާ ގެބްރީލް މަގަޅެސް ހުރަސްކޮށްލި ރީތި ބޯޅަ އެހާމެ ރީއްޗަށް ބޮލުން ޖަހައިގެން ކަސެމީރޯ އެވެ.