އުމުރަށް ބަލައި ކުޑަކުދިން ސޯޝަލް މީޑިއާ ބޭނުންކުރުން ހަނިކުރާނެ އާ އުސޫލުތަކެއް ތައާރަފުކުރުމަށް ޔޫރަޕިއަން ޔޫނިއަން (އީޔޫ)ން ތައްޔާރުވެއްޖެއެވެ.
ޔޫރަޕިއަން ކޮމިޝަނުގެ ރައީސް އުރުސުލާ ފޮން ޑެއިލަޔަން ވަނީ، އިންޓަނެޓްގެ ވަސީލަތްތައް ބޭނުންކުރާ ޒުވާން ކުދިން ރައްކާތެރިކުރުމަށްޓަކައި އެ އިއްތިހާދުން މިހާތަނަށް ހިންގާ އެންމެ ފުޅާ މަޝްރޫއުގެ ދަށުން މި ފިޔަވަޅުތައް އެޅުމަށް ރާވާފައިވާކަން އިއްޔެ އިއުލާން ކުރައްވާފަ އެވެ.
ބްރަސަލްސްގައި ވާހަކަދައްކަވަމުން ފޮން ޑެއިލަޔަން ވިދާޅުވީ، ސޯޝަލް މީޑިއާ ބޭނުންކުރުމުގައި މަރުހަލާތަކަކަށް ބަހާލައިގެން އަމަލުކުރުމަށް ތަޖުރިބާކާރުން ދެއްވާފައިވާ ލަފާގެ މައްޗަށް ބިނާކޮށް ޔޫރަޕިއަން ކޮމިޝަނުން ގާނޫނެއް އެކުލަވާލާނެ ކަމަށެވެ. މި ހުށަހެޅުމުގެ ދަށުން، އުމުރުން 13 އަހަރުން ދަށުގެ ކުދިންނަށް ސޯޝަލް މީޑިއާ ބޭނުންކުރެވޭނީ މައިންބަފައިން، ބަލަދުވެރިން ނުވަތަ މުދައްރިސުންގެ ބެލުމުގެ ދަށުން ވަކި ވަގުތުތަކެއްގަ އެވެ. އަދި ކުދިންގެ އުމުރުން ދުވަސްވާ ވަރަކަށް މި ހަނިކުރުންތަކަށް ލުއިތަކެއް ދެވޭނެ އެވެ.
”ޕްލެޓްފޯމްތަކުގައި އުމުރާ ގުޅޭ ހަނިކުރުންތަކެއް ހުންނަންޖެހޭކަން ވަރަށް ސާފު. ސުވާލަކީ މިހާރު ކުދިންނަށް އިންޓަނެޓުން ނުރައްކާ ކުރިމަތިވޭތޯ ނުވަތަ ނޫންތޯއެއް ނޫން. ސުވާލަކީ ކުދިންނަށް އިންޓަނެޓުގައި ރައްކާތެރި ފެށުމެއް ހޯދައިދިނުމަށް އަޅުގަނޑުމެންނަށް ކުރެވޭނީ ކޮން ކަމެއްތޯ“ ފޮން ޑެއިލަޔަން ވިދާޅުވިއެވެ.
ފޮން ޑެއިލަޔަން ވިދާޅުވި ގޮތުގައި، މި ފިޔަވަޅުތައް މައިގަނޑު ގޮތެއްގައި އަމާޒުކުރާނީ ސޯޝަލް މީޑިއާ ޕްލެޓްފޯމްތަކަށެވެ. ނަމަވެސް މީގެ އިތުރުން އުމުރާ ނުގުޅޭ އަދި ދެވިހިފާ ފަދަ ސިފަތައް އެކުލެވޭ އިންޓަނެޓްގެ އެހެނިހެން ހިދުމަތްތައް ވެސް މީގެ ދަށުން ހިމެނޭނެ އެވެ. އޭނާ މި މަޝްރޫއުގެ ދާއިރާ ސިފަކުރެއްވީ ”ސޯޝަލް މީޑިއާ ޕްލަސް“ގެ ގޮތުގައެވެ.