ސަޢުދީ ޢަރަބިއްޔާގެ ވެރިރަށްރިޔާޟުގެ ކިންގް ޚާލިދު އިންޓަނޭޝަނަލް އެއާޕޯޓަށް ޙޫޘީން ދިން ޙަމަލާއެއްގައި ތިން މީހުން މަރުވެ، ސައުދީ އެއާލައިންސްގެ ބޯޓަކަށް ބޮޑެތި ގެއްލުންތަކެއް ވުމާ ގުޅިގެން، ސަޢުދީ އިއްތިހާދާއި ޔަމަން ސަރުކާރު ގުޅިގެން ޞަންޢާގައި ހުރި ޙޫޘީންގެ މަރުކަޒުތަކަށް ވަރުގަދަ ވައިގެ ރައްދު ޙަމަލާތަކެއް ދީފިއެވެ.
މި އޮޕަރޭޝަނުގައި ތަޢިއްޒާއި ރަތްކަނޑުގެ އައްސޭރިފަށުގައި ޙޫޘީން މިސައިލް ފޮނުވަން ބޭނުންކުރި ތިން ޕްލެޓްފޯމެއް ހަލާކުކޮށްލާފައިވާއިރު، އިއްތިހާދުން ބުނަނީ މިއީ ބައިނަލްއަޤްވާމީ ކަނޑުދަތުރުފަތުރަށާއި މަދަނީ ވަސީލަތްތަކަށް އަމާޒުވާ ޢުދުވާނުތައް ހުއްޓުވުމަށް ހިންގާ އޮޕަރޭޝަނެއް ކަމަށެވެ.
މި ޙަމަލާތަކާ ގުޅިގެން ޙޫޘީންގެ އަސްކަރީ ތަރުޖަމާނު ޔަޙްޔާ ސަރީޢު ވަނީ ސަޢުދީގެ ވައިގެ ސަރަޙައްދާއި އެއާޕޯޓްތަކަކީ އަސްކަރީ އަމާޒުތަކެއް ކަމަށް ކަނޑައަޅައި، އެ ޤައުމުގެ ތެޔޮ މަރުކަޒުތައް ދޫކޮށް ދިއުމަށް ބޭރުގެ މާހިރުންނަށް އިންޒާރު ދެއްވާފައެވެ. މި ނުތަނަވަސްކަމާ ގުޅިގެން ބައިނަލްއަޤްވާމީ ބައެއް އެއާލައިންތަކުން ރިޔާޟަށް ކުރާ ދަތުރުތައް ވަގުތީގޮތުން މެދުކަނޑާލައި، ވިލާތުގެ އިއްތިހާދުގެ އޭވިއޭޝަން އިދާރާއިން އެ ސަރަޙައްދުގެ ވައިގެ ޖާގަ ބޭނުންކުރުމުގައި ސަމާލުވުމަށް އަންގާފައިވެއެވެ.
ރިޔާޟް އެއާޕޯޓުގެ ޚިދުމަތްތައް އަލުން އާންމު ޙާލަތަށް ގެނައުމުގެ މަސައްކަތް ދަނީ ކުރިއަށެވެ.
މީގެއިތުރުން، ފާއިތުވި ސެޕްޓެމްބަރު މަހު ޙޫޘީން ބާބުލް މަންދަބު ހިސާރުކުރަން އުޅުނު ނަމަވެސް އެ ސަރަޙައްދުން މިހާރު ޙޫޘީން ފަހާލެވިފައިވާ ކަމަށް ސަޢުދީން ބުނެއެވެ.
2014 އިން ފެށިގެން ކުރިއަށްދާ މި ހަނގުރާމައިގެ ޙަމަލާތައް ޖުލައި މަހުން ފެށިގެން ވަނީ އިތުރަށް ވަރުގަދަވެފައެވެ.