އެލް ނީނޯގެ މޫސުމީ ނޭދެވޭ އަސަރުތަކާއެކު ޣައްޒާއަށް ބޯކޮށް ވާރޭވެހި، ފެންބޮޑުވުމުގެ ބޮޑު ކާރިސާއެއް ކުރިމަތިވެދާނެ ކަމުގެ އިންޒާރު އދ. ގެ ހިޖުރައާބެހޭ ބައިނަލްއަޤްވާމީ އިދާރާ (އައިއޯއެމް) އިން ދީފިއެވެ.
މިފަދަ ނުރައްކާތެރި ހާލަތެއް ކުރިމަތިވެފައިވާއިރު، އިސްރާއީލުން އަޅާފައިވާ ހުރަސްތަކުގެ ސަބަބުން ހާލުގައި ޖެހިފައިވާ ރައްޔިތުންނަށް ބޭނުންވާ ފޭލިގެތަކާއި ވަގުތީ ހިޔާވަހިކަމުގެ ސާމާނު ފޯރުކޮށްދިނުމަށް ވަނީ ބޮޑެތި ގޮންޖެހުންތަކަކާ ކުރިމަތިލާން ޖެހިފައެވެ.
ކުރިއަށް އޮތް ފިނި މޫސުމާ ކުރިމަތިލާއިރު، ޣައްޒާގެ މުޅި އާބާދީއަށް ކަހަލަ ގޮތަކަށް ޓެންޓާއި އަސާސީ ހިޔާވަހިކަން ކޮންމެހެން ބޭނުންވެފައިވާ ކަމަށް އައިއޯއެމް އިން ހާމަކުރެއެވެ. އދ. ގެ މޫސުމާބެހޭ މާހިރުން އަންދާޒާކުރާ ގޮތުގައި، ކުރިއަށް އޮތް އެލް ނީނޯ މޫސުމަކީ ފަހުގެ ތާރީޚެއްގައި ފެންނާނެ އެންމެ ވިއްސާރަ އަދި ގަދަފަދަ މޫސުމަށް ވުން އެކަށީގެންވެއެވެ. މީގެ އިތުރުން، ޣައްޒާގެ އިމާރާތްތަކަށް ލިބިފައިވާ ގެއްލުންތަކާއި، ނަރުދަމާގެ ނިޒާމު އެއްކޮށް ސުންނާފަތިވެފައި ވުމުގެ ސަބަބުން، ބޮޑެތި ސަރަޙައްދުތަކުގައި ފެންބޮޑުވެ، ބަލިމަޑުކަން ފެތުރުމުގެ ބިރުވެސް ވަނީ އިންތިހާއަށް ބޮޑުވެފައެވެ.
އައިއޯއެމްގެ ޑިރެކްޓަރ ޖެނެރަލް އެމީ ޕޯޕް ވިދާޅުވި ގޮތުގައި، 2023 ވަނަ އަހަރުގެ އޮކްޓޫބަރު މަހުން ފެށިގެން ހިނގަމުންދާ ހަނގުރާމައިގެ ސަބަބުން ސުންނާފަތިވެފައިވާ ޣައްޒާގައި ގާތްގަނޑަކަށް 2 މިލިއަން މީހުން ކުއްލި އެހީއަށް ބޭނުންވެއެވެ. ނަމަވެސް މި ފިނި މޫސުމަށް އެ ސަރަޙައްދަށް ބޭނުންވާ ސާމާނުގެ ތެރެއިން މިހާތަނަށް ފޯރުކޮށްދެވުނީ އެންމެ 17 އިންސައްތަ ކަމަށް އޭނާ ފާހަގަކުރެއްވިއެވެ.
އެތައް ފަހަރަކު ގެދޮރު ގެއްލި ނިކަމެތިވެފައިވާ އާއިލާތަކަށް ރައްކާތެރިކަން ހޯދައިދިނުމަކީ ކޮންމެހެން ކުރަންޖެހޭ ކަމެއް ކަމަށާއި، ނަމަވެސް އިސްރާއީލުން ގަސްދުގައި ކުރިމަތިކުރާ ހުރަސްތަކުގެ ސަބަބުން އިންސާނީ އެހީ ފޯރުކޮށްދިނުމަށް ބޮޑެތި ލަސްތަކެއް ކުރިމަތިވަމުންދާ ކަމަށްވެސް އޭނާ ވިދާޅުވިއެވެ.
ލަކުޑިއާއި، ދަގަނޑު، ސަތަރި އަދި އެހެނިހެން ޒަރޫރީ ސާމާނު ހިމެނޭ 8,600 ވަގުތީ ހިޔާވަހިކަމުގެ ކިޓް ޣައްޒާއަށް އެތެރެކުރުމަށް އިސްރާއީލުގެ އަސްކަރިއްޔާއިން ވަނީ ހުރަސްއަޅާފައެވެ. އިސްރާއީލުން ބުނަމުންދަނީ އެއީ މަދަނީ ބޭނުމުގެ އިތުރުން އަސްކަރީ ބޭނުންތަކަށްވެސް ބޭނުންކުރެވިދާނެ ތަކެތި ކަމަށެވެ.
އައިއޯއެމް އިން އިތުރަށް ހާމަކުރި ގޮތުގައި، ބައެއް ސަތަރި އަދި މަދު ޓެންޓުކޮޅެއް އެތެރެކުރެވުނު ނަމަވެސް، އެއީ ބޭނުންވާ މިންވަރާ އަޅައިބަލާއިރު ވަރަށް ކުޑަ މިންވަރެކެވެ. މިހާރު ބޭނުންކުރަމުންދާ ޓެންޓުތަކާއި ވަގުތީ ހިޔާތަކުގެ ދެބައިކުޅަ އެއްބަޔަށްވުރެ ބޮޑުބައި ވަނީ ބާވެ ވީދިފައެވެ. އަދި ބޮންއަޅައި ހަލާކުކޮށްލާފައިވާ އިމާރާތްތަކަކީ ރައްކާތެރި ތަންތަނަށް ނުވާތީ، އާންމުން ދާނެ އެހެން އެއްވެސް ތަނެއް ނެތެވެ.
މިދިޔަ އޮގަސްޓު މަހު އެކަނިވެސް ވެއްޓުމުގެ ނުރައްކާ އޮތް 3,600 އަށްވުރެ ގިނަ އިމާރާތް ފާހަގަކުރެވިފައިވާއިރު، ޣައްޒާގެ 1.8 މިލިއަން މީހުން މިވަގުތުވެސް ދިރިއުޅެމުންދަނީ ފެންބޮޑުވުމުގެ ބޮޑު ނުރައްކަލެއްގެ ތެރޭގައި ތިބެގެން ކަމަށް އެ އިދާރާއިން ވަނީ ބުނެފައެވެ.