ވޯލްޑް ކަޕްގެ ގްރޫޕް ސްޓޭޖުގެ ފަހު މެޗުގައި ކޮލަމްބިއާ އާ ދެކޮޅަށް ނުކުންނައިރު ޕޯޗުގަލް އޮތީ ފުރިހަމައަށް ތައްޔާރުވެފައި ކަމަށް އެ ޓީމުގެ ކޯޗު ރޮބާޓޯ މާޓިނޭޒް ބުނެފި އެވެ.
ގްރޫޕް ކޭ ގައި ހިމެނޭ މި ދެ ޓީމު ބައްދަލުކުރާ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި މާޓިނޭޒް ވަނީ ޓީމުގެ ތައްޔާރީތަކާ މެދު ހިތްހަމަޖެހުން ފާޅުކޮށްފަ އެވެ. މާޓިނޭޒް ހާމަކުރި ގޮތުގައި މި މެޗަށް ތައްޔާރުވުމުގެ މަސައްކަތް ޕޯޗުގަލްއިން ފަށާފައިވަނީ މީގެ މަސްތަކެއް ކުރިންނެވެ.
”މި މެޗުގެ ތައްޔާރީތައް މިދިޔަ މާރިޗް މަހުގަ އަހަރެމެން ފަށައިފިން. މި ތަނުގެ މޫސުމަށް ހޭނުމަށް މިހާތަނަށް 13 ޓްރެއިނިންގ ސެޝަން ކުރިއަށްގެންގޮސްފިން،“ މާޓިނޭޒް ބުންޏެވެ.
އޭނާ އިތުރަށް ބުނީ އެންމެ ކުރިއްސުރެ ވެސް ޕްލޭންކޮށްފައި އޮތީ މިއާމީގައި ތިބެގެން ކޮލަމްބިއާ މެޗަށް ތައްޔާރުވުމަށް ކަމަށެވެ.
މިއާމީގެ ސަރަހައްދުގައި ގިނަ އަދަދެއްގެ ކޮލަމްބިއާ ސަޕޯޓަރުން އުޅޭތީ، މިއީ ޕޯޗުގަލްއަށް މި މުބާރާތުގައި ކުރިމަތިވާ ފުރަތަމަ ”އަވޭ މެޗު“ ގެ އިހުސާސް ކުރެވޭނެ މެޗަކަށް ވާނެ ކަމަށް މާޓިނޭޒް ފާހަގަކުރިއެވެ. މެޗުގެ ޓިކެޓަށް އޮތް ބޮޑު ޑިމާންޑަށް އިޝާރާތް ކުރަމުން އޭނާ ބުނީ، އާއިލާގެ މެންބަރުންނަށް ވެސް ޓިކެޓް ހޯދުމަށްޓަކައި މިދިޔަ ނޮވެންބަރު މަހު މަސައްކަތް ކުރަން ޖެހުނު ކަމަށެވެ.
މުބާރާތް ކާމިޔާބު ކުރުމުގެ އަޒުމުގައި ހުރި މާޓިނޭޒް ބުނީ ކޮންމެ ޓީމަކާ ދެކޮޅަށް ކުޅުނު ކަމުގައި ވިޔަސް ފުރިހަމަ އިހުތިރާމް ދޭންޖެހޭނެ ކަމަށެވެ. ”ވޯލްޑް ކަޕް ކާމިޔާބުކުރެވޭނީ ހުރިހާ ޓީމެއް ބަލިކޮށްގެން،“ ކަމަށް އޭނާ ބުންޏެވެ. އަދި ނެސްޓޯ ލޮރެންޒޯގެ އިރުޝާދުގެ ދަށުން ކުޅޭ ކޮލަމްބިއާ ޓީމަކީ ޓެކްޓިކަލީ ވަރަށް ވަރުގަދަ ގޮންޖެހުންތަކެއް ކުރިމަތިކުރާނެ ޓީމެއްކަން އޭނާ ފާހަގަކުރިއެވެ.
ކޮލަމްބިއާ ޓީމުގައި ތިބި ނުރައްކާތެރި ކުޅުންތެރިންނަށް ބަލާއިރު، ކެޕްޓަން ހަމޭސް ރޮޑްރިގޭޒްގެ އިތުރުން ލުއިސް ސުއަރޭޒް އަދި ލުއިސް ޑިއާޒް ފަދަ ހަލުވި ކުޅުންތެރިންނަކީ ޓްރާންސިޝަންތަކުގައި ވަރަށް ނުރައްކާތެރި ބައެއް ކަމަށް މާޓިނޭޒް ސިފަކުރިއެވެ. އޭނާ ބުނި ގޮތުގައި ކޮލަމްބިއާ އަކީ ޓީމެއްގެ ގޮތުގައި ވަރަށް އޯގަނައިޒްކޮށް މަސައްކަތްކުރާ ބައެކެވެ.
މާޓިނޭޒްގެ ވާހަކަ ނިންމާލަމުން ބުނީ، ކޮލަމްބިއާ ޓީމުގައި ހިމެނޭ ކޮންމެ ކުޅުންތެރިއަކީ ވެސް ގައުމީ ޓީމަށް ހާއްސަ ލޯތްބެއް އޮންނަ، ހުނަރުވެރި ކުޅުންތެރިންތަކެއް ކަމަށެވެ.