ފިލިޕީންސްގައި ދަތުރުކުރަމުންދިޔަ ފެރީއެއްގައި އަލިފާން ރޯވެ ހިނގި ނުރައްކާތެރި ހާދިސާގައި މަދުވެގެން 35 މީހުން މަރުވެ، 50 އަށްވުރެ ގިނަ މީހުން ވީނުވީއެއް ނޭނގި ގެއްލިއްޖެއެވެ.
އަނދައި އަޅިއަށްވެފައިވާ އުޅަނދުގެ ތެރެއިން ހަށިގަނޑުތައް ނަގައި، މަރުވި މީހުން ދެނެގަތުމުގެ އުނދަގޫ މަސައްކަތް އެ ޤައުމުގެ ކަމާބެހޭ އިދާރާތަކުން މިހާރު ވަނީ ފަށައިފައެވެ.
އަލިފާން ރޯވީ ޕަލަވާންގެ ކޮރޮންގެ އައްސޭރިފަށުން ދަތުރުކުރި ’އެމްވީ ޖޫން އެސްޓަރ‘ ކިޔާ ފެރީއެއްގައެވެ. ކޯސްޓްގާޑުން ނެގި ހަށިގަނޑުތައް މިހާރު ވަނީ ކޮރޮން އަވަށުގެ ބަނދަރަށް ގެންގޮސްފައެވެ. އަދި އެ ސަރަޙައްދުގައި ފޮރެންސިކް ޓީމުތަކުން މަރުވި މީހުން ދެނެގަތުމުގެ މަސައްކަތް ކުރިއަށް ގެންދިއުމަށްޓަކައި ވަގުތީ ޓެންޓްތަކެއް ވަނީ ޖަހައިފައެވެ.
130 އަށްވުރެ ގިނަ ފަސިންޖަރުންނާއެކު ދަތުރުކުރި މި ފެރީގައި އަލިފާން ރޯވީ، ގާތްގަނޑަކަށް 20 ގަޑިއިރުގެ ދިގު ދަތުރު ނިމެން ކުޑަތަންވެފައި ވަނިކޮށެވެ.
އަލިފާންގަނޑު ކޮންޓްރޯލް ކުރެވުނުތާ 24 ގަޑިއިރު ފަހުން، އަލިފާންނިއްވާ ޓީމުތަކަށް ވަނީ ފެރީގެ އެތެރެއަށް ވަދެވިފައެވެ. ބޯ ދުމާއި ގަދަ ހޫނުގެ ސަބަބުން ވަނުމަށް ހުރަސްއެޅިފައިވާ ބައިތައް ބެލިއިރު، މަރުވެފައިވާ މީހުންގެ ހަށިގަނޑުތައް އެންމެ ގިނައިން ފެނިފައިވަނީ ފެރީގެ އިކޮނޮމީ ކްލާހުގެ އެކޮމޮޑޭޝަން ބައިން ކަމަށް ކޯސްޓްގާޑުން މަޢުލޫމާތު ދެއެވެ. ކޯސްޓްގާޑުން އާންމުކުރި ފޮޓޯތަކުން ފެންނަ ގޮތުގައި ގަދަ ހޫނުގެ ސަބަބުން އެނދުތަކުގެ ދަގަނޑުތައް ވަނީ ވިރި، ބިމާ ހަމަވެފައެވެ.
ފިލިޕީންސްގެ ކޯސްޓްގާޑުގެ އޮފިޝަލް ޖެރޯނިމޯ ޓުވިއްޔާ ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ، މިވަގުތު އެންމެ ބޮޑު އިސްކަމެއް ދެނީ މަރުވި މީހުންގެ ވަނަވަރު ކަށަވަރުކުރުމަށާއި، ހާދިސާ ހިނގަން މެދުވެރިވި ސީދާ ސަބަބު ދެނެގަތުމަށެވެ. ކަނޑުދަތުރުފަތުރާބެހޭ އިދާރާއިން ބުނި ގޮތުގައި، ސަލާމަތްވި މީހުންގެ ބަޔާންތަކުން އެނގޭ ގޮތުގައި އަލިފާން ރޯވުމުގެ ކުޑަވަގުތުކޮޅެއް ކުރިން އުޅަނދުގެ އެތެރެއިން ދެ ގޮވުމެއްގެ އަޑު އިވުނެވެ. އަދި ދުމުގެ އަސަރު ފުރަތަމަ އިޙްސާސްކުރެވުނުތާ މަދު ސިކުންތުކޮޅެއްގެ ތެރޭގައި މުޅި ފެރީއަށް އަލިފާން ފެތުރުނެވެ.
މި ހާދިސާއާ ގުޅިގެން އުޅަނދުގެ ކެޕްޓަނާމެދު ވެސް ސުވާލުތަކެއް އުފެދިފައިވާއިރު، ކޯސްޓްގާޑުގެ ތަރުޖަމާނު ކޮމޮޑޯ ނޯމީ ކަޔާބްޔާބް ވިދާޅުވީ ކެޕްޓަން ސަލާމަތުން ހުރިކަމުގެ މަޢުލޫމާތު ލިބިފައިވީ ނަމަވެސް، ސަލާމަތްވިކަން ރަސްމީކޮށް ކަށަވަރުވެފައިވާ 43 މީހުންގެ ލިސްޓުގައި އޭނާގެ ނަން އަދި ހިމެނިފައެއް ނުވެއެވެ.