ބްރެޒިލްގެ ކުޅުންތެރިޔާ ނޭމާ ކޮވިޑް 19 އަށް ޕޮސިޓިވްވެ، އެކަހެރިކޮށްފައިވާ ކަމަށް އޭނާގެ ކްލަބު ސަންޓޯސްއިން ބުނެފިއެވެ.
ސަންޓޯސްއިން އިއްޔެ ނެރުނު ބަޔާނުގައި ބުނެފައިވާ ގޮތުގައި، އުމުރުން 33 އަހަރުގެ ނޭމާގެ ކިބައިން ކޮވިޑްގެ އަލާމާތްތައް ފެންނަން ފެށީ މިދިޔަ ބުރާސްފަތި ދުވަހުއެވެ. އެ ދުވަހު ކުރި ޓެސްޓުން ޕޮސިޓިވްވުމާއި ގުޅިގެން މިހާރު ވަނީ އެކަހެރިކޮށްފައެވެ.
މި ކަމާއި ގުޅިގެން، މިހަފުތާ ބުރާސްފަތި ދުވަހު ފޯޓަލޭޒާއާ ދެކޮޅަށް ކުޅެން އޮތް މެޗުގައި ނޭމާއަށް ބައިވެރިއެއް ނުވެވޭނެއެވެ. ނަމަވެސް، މި މެޗުގައި ނޭމާ ނުކުޅެވެނީ ސަސްޕެންޝަނެއްގެ ސަބަބުންނެވެ. ކޮވިޑާ ގުޅިގެން ނޭމާ ކުޅުމާ ދުރަށް ދާންޖެހޭނީ ކިހާ މުއްދަތަކަށްކަން ސަންޓޯސްއިން އަދި ހާމަކޮށްފައެއް ނުވެއެވެ.
ސައުދީ އަރަބިއާގެ އަލް ހިލާލުން ސަންޓޯސްއަށް ބަދަލުވި ނޭމާ، އެ ކްލަބުގައި މިހާތަނަށް ކުޅެފައިވަނީ 12 މެޗެވެ. މި މެޗުތަކުގައި އޭނާ ވަނީ ތިން ގޯލު ޖަހައި، ތިން އެސިސްޓް ފުރިހަމަކޮށްދީފައެވެ.
ނޭމާގެ މިހާރުގެ އެއްބަސްވުން ޖޫން 30 ގައި ހަމަވާއިރު، ކުރިއަށް އޮތް ކްލަބު ވޯލްޑް ކަޕަށް ބްރެޒިލް ލީގު މެދުކަނޑާލަން ހަމަޖެހިފައިވުމާއެކު، ސަންޓޯސްގައި އޭނާގެ ކުރިމަގާމެދު ވަނީ ސުވާލު އުފެދިފައެވެ.
އަނިޔާގެ މައްސަލަތަކާ ކުރިމަތިލާންޖެހުމާއެކު، ސަންޓޯސްގައި ނޭމާގެ މި ދައުރު އެހާ ކާމިޔާބު ދައުރަކަށް ވެފައެއް ނުވެއެވެ.
ކޮވިޑަށް ޕޮސިޓިވްވުމާއެކު، އިތުރު ގޮންޖެހުންތަކަކާ ނޭމާއަށް ވަނީ ކުރިމަތިލާން ޖެހިފައިވެއެވެ.