ޔޫއެފާ ޗެމްޕިއަންސް ލީގުގެ ޗެމްޕިއަން ޕީއެސްޖީއާއި ޔޫރޮޕާ ލީގުގެ ޗެމްޕިއަން ޓޮޓެންހަމްއާ ދެމެދު ކުޅުނު ޔޫއެފާ ސުޕަ ކަޕް މެޗު، ޕީއެސްޖީން 3-4 އިން ކާމިޔާބު ކޮށްފިއެވެ.
އިޓަލީގެ ބްލޫއެނާޖީ ސްޓޭޑިއަމްގައި ރޭ ކުޅުނު މި މެޗުގެ ފުރިހަމަ ވަގުތު ހަމަވި އިރު، 2-2 އިން އެއްވަރުވެފައި އޮތުމުން ޕީއެސްޖީން މޮޅުވީ ޕެނަލްޓީ ޖަހައިގެންނެވެ.
މެޗުގެ ފުރަތަމަ ހާފުގައި ޓޮޓެންހަމްއަށް ލީޑު ހޯދައިދިނީ މިކީ ވެން ޑެ ވެން އެވެ. އޭނާ މި ގޯލު ޖެހީ ޖައޯ ޕައުލީނިއާގެ ހަމަލާއެއް ޕީއެސްޖީގެ ކީޕަރު ލޫކަސް ޝެވަލިއޭގެ އަތުގައި ޖެހި ނުކުތުމުންނެވެ. ދެވަނަ ހާފުގައި ކްރިސްޓިއަން ރޮމޭރޯގެ ގޯލަކުން ޓޮޓެންހަމްގެ ލީޑު 2-0 އަށް ފުޅާކުރިއެވެ.
ނަމަވެސް މެޗުގެ ފަހު 10 މިނެޓުގައި ޕީއެސްޖީން ވަނީ މެޗު އަނބުރާލާފައެވެ. ލީ ކޭންގް-އިން އާއި ބަދަލު ކުޅުންތެރިއެއްގެ ގޮތުގައި ނުކުތް ގޮންކާލޯ ރާމޯސް ޖެހި ދެ ގޯލުން މެޗު އެއްވަރުކުރިއެވެ.
ޕެނަލްޓީ ޝޫޓްއައުޓްގައި ޕީއެސްޖީގެ ކީޕަރު ޝެވަލިއޭ ކުރި މުހިއްމު ސޭވަކާއެކު، ޓޮޓެންހަމްގެ ވެން ޑެ ވެން އާއި މަތެއަސް ޓެލްގެ ޕެނަލްޓީތައް ބަލިވުމުން މެޗު ނިމުނީ ޕީއެސްޖީގެ ކާމިޔާބީއާ އެކުގައެވެ. މިއީ ކްލަބު ވޯލްޑް ކަޕް ފައިނަލުގައި ޗެލްސީ ކައިރިން ބަލިވުމަށްފަހު ޕީއެސްޖީން ހޯދި މުހިއްމު ކާމިޔާބީއެކެވެ.
މިއީ ޕީއެސްޖީން ސުޕަ ކަޕް ކާމިޔާބުކުރި ފުރަތަމަ ފަހަރެވެ.